कर्मचारी कुटपीट प्रकरण : डीएसपीलाई सचेत, असई निलम्बन, अधिकृतको सरुवा

१७ माघ, काठमाडौं । विमानस्थलमा प्रहरी कर्मचारी कुटपटि प्रकरणमा डीएसपीलाई लिखित सचेत गराउने, असईलाई निलम्बन र अधिकृतलाई सरुवासहित विभागीय कारबाहीको सिफारिस भएको छ । त्रिभुवन अन्तर्राष्ट्रिय विमानस्थल, अध्यागमन कार्यालयभित्र भएको कुटपटिको छानबिन गर्न बनेको समितिले सो सिफारिस गरेको हो ।

विमानस्थल सुरक्षार्थ खटिएका डिएसपी रेवतीरमण पोखरेललाई कमाण्ड सम्हाल्न नसकेको आरोप लागेको छ । विमानस्थलमा कर्मचारी र प्रहरीबीच भएको कुटाकुट प्रकरणमा डीएसपी पोखरेल मातहत रहेका प्रहरीले कर्मचारीमाथि कुटपिट गरेको उनले कमाण्ड सम्हाल्न नसकेको भन्दै लिखित सचेत गराउन सिफारिस गरिएको छ ।

साथै अधिकृत छाँयालाल मोक्तानलाई अध्यागमन कार्यालयबाट हटाई विभागीय कारवाही गर्न र  कुटपिटमा संलग्न असई सन्जय तामाङलाई निलम्बन गर्न सिफारिस गरिएको छ । विमानस्थलमा कर्मचारी र प्रहरीबीच कुटाकुट भएको घटनाबारे छानबिन गर्न गृह मन्त्रालयले बनाएको समितिले प्रतिवेदन बुझाउँदै त्यस्तो सिफारिस गरेको हो । त्यसैगरी प्रहरी जवानद्वय रविरञ्जन गुप्ता र राजकुमार महत्तोलाई विभागीय कारबाही गर्न सिफारिस गरिएको छ ।

गत शुक्रबार विमानस्थलस्थित अध्यागमन कार्यालयमा कर्मचारी र प्रहरीबीच विवाद हुँदा कुटाकुट भएको थियो । सो घट्नालाई लिएर माघ १२ गते मन्त्रालयका सहसचिव थानेश्वर गौतमको संयोजकत्वमा छानबिन समिति बनाएको थियो । गठित समितिले गृहमन्त्रालयमा बुझाएको प्रतिवेदन अनुसार कुटपीटमा संलग्न अन्य दुई प्रहरीलाई भने विभागीय कारबाहीको सिफारिस गरिएको छ ।

छानबिन समितिमा प्रहरी नायब महानिरीक्षक राजेशनाथ बास्तोला र सीमा तथा अध्यागमन प्रशासन शाखाका उपसचिव कुल बहादुर जिसी सदस्य थिए । उनीहरूले सो प्रतिवेदन बुधबार मन्त्रालयमा बुझाएका हुन् । कर्मचारी कुटपीटपछि  त्रिभुवन अन्तर्राष्ट्रिय विमानस्थलमा कार्यरत कर्मचारीहरू प्रहरीलाई कारबाही माग गर्दै कालोपट्टी बाँधेर काम गरिरहेका थिए । कर्मचारीहरूले प्रहरीलाई कारवाही नभई देशव्यापी आन्दोलन गर्ने चेतावनी समेत दिएका थिए । तर गृहमन्त्री नारायणकाजी श्रेष्ठले समितिको प्रतिवेदन आएपछि कानुन अनुसार कारबाही गर्ने बताएका थिए ।

प्रहरीले अध्यागमनका नौ अधिकृतबीच भिजिट भिषाको सन्दर्भमा प्रतिशोध चलिरहेको छ । त्यही क्रममा प्रहरीले सहित २२ जनालाई ‘भिजिट भिसा’ मा मानव तस्करीको अभियोगमा मुद्दा चलाउनुपर्ने रायसहितको प्रतिवेदन सरकारी वकिल कार्यालय काठमाडौंलाई बुझाएको छ । नक्कली कागजात बनाएर भिजिट भिसामा विदेश पठाउने गिरोहबारे अनुसन्धान गरेको जिल्ला प्रहरी परिसर काठमाडौंले सरकारी वकिल कार्यालयलाई प्रतिवेदन बुझाउँदै दोषी देखिएका २२ जनाविरुद्ध मुद्दा चलाउन राय दिएको थियो ।

दोषी देखिएका २२ मध्ये १० जना प्रहरीको नियन्त्रणमा छन् भने १२ जनाविरुद्ध पक्राउ पुर्जी जारी गरिएको छ । प्रहरीले नियन्त्रणमा लिएकामा त्रिभुवन अन्तर्राष्ट्रिय विमानस्थलमा कार्यरत अध्यागमन अधिकृत नरवीर खड्का र बाँकी नौजना ट्राभल एजेन्सी सञ्चालक छन् ।फरार सूचीमा अध्यागमनका पूर्वअधिकृतहरू ताराबहादुर कुँवर, कुशल बराल, शैलेन्द्र ढकाल, विमल पौडेल, विष्णु अर्याल, विकास डंगोल, पिताम्बर रिमाल र सुजन फागो छन्। बाँकी चारजना बिचौलिया रहेको प्रहरीले जनाएको छ ।