फागुन २९ मा राष्ट्रिय सभा अध्यक्षको निर्वाचन गराउने तयारी, गठबन्धनमा छलफल सुरु

२१ माघ, काठमाडौं । आगामी फागुन २९ भित्र राष्ट्रिय सभा अध्यक्ष पदको निर्वाचन गराउने तयारी सुरु भएको छ । संसद सचिवालयले फागुन २९ गतेभित्र अध्यक्ष चयन हुने गरी तयारी थालिएको जनाएको छ । राष्ट्रिय सभा अध्यक्षका लागि अहिलेसम्म दुई जना सम्भावित उम्मेदवार देखिएका छन् । सत्ता गठबन्धनमा पनि राष्ट्रिय सभा अध्यक्षका विषयमा छलफल सुरु भइसकेको छ ।  

नेपाली कांग्रेसबाट नेता कृष्णप्रसाद सिटौला र राष्ट्रिय सभाकी उपाध्यक्ष उर्मिला अर्यालको चर्चा छ । सत्ता गठबन्धनबाट नै राष्ट्रिय सभाको अध्यक्ष बन्ने भएकाले को उम्मेदवार हुने भन्ने विषयमा सत्ता गठबन्धनले निर्णय गर्नु पर्छ । सत्ता गठबन्धनमा फलानो दललाई राष्ट्रिय सभा दिने भनेर सहमति भएपछि त्यो दलले उम्मेदवार चयन गरेर पठाउने छ । 

अध्यक्ष गणेशप्रसाद तिमिल्सिनासहित राष्ट्रिय सभाका २० जना सदस्यको पदावधि फागुन २० गते सकिँदैछ । राष्ट्रिय सभाको कार्य व्यवस्था तथा परामर्श समितिको बैठकले तयार गरेको सम्भावित कार्यसूची बमोजिम अध्यक्षको निर्वाचन आगामी फागुन २९ गतेभित्र गर्न लागिएको हो । संसद सचिवालयका सहसचिव एवं प्रवक्ता एकराम गिरीले मिति तय नभएपनि निर्वाचनको तयारी सुरु भएको बताए ।

माघ १० गते भएको निर्वाचनबाट राष्ट्रिय सभामा रिक्त हुन लागेका २० मध्ये १९ सदस्य निर्वाचित भइसकेका छन् । एकतिहाइ सदस्य निर्वाचित भएर आएपछि माओवादी केन्द्र संघीय संसदको माथिल्लो सदन राष्ट्रिय सभाको सबैभन्दा ठूलो दल बनेको छ । कांग्रेसले दोस्रो ठूलो दलको हैसियत पाएको छ । यिनै दुई दलमध्ये एक दलबाट राष्ट्रिय सभा अध्यक्ष बन्ने सम्भावना छ ।  

सचिवालयले प्रकाशित गरेको कार्यसूची बमोजिम राष्ट्रिय सभा अध्यक्षको निर्वाचनको दिन र समय निर्धारण गरिने छ । अध्यक्षमा सत्ता गठबन्धनका प्रमुख घटक कांग्रेस र माओवादीले दावी गरेका छन् । राष्ट्रिय सभामा पहिलो दल भएकाले आफ्नो पार्टीले अध्यक्ष दावी गरेको माओवादी नेताको भनाइ छ । प्रधानमन्त्रीबाट पुष्पकमल दाहाल प्रचण्ड हटेपछि संवैधानिक परिषदमा माओवादी शून्य हुनेछ । ​​​​

संवैधानिक परिषदमा माओवादीको उपस्थिति नहुने भएकोले कांग्रेससँग नयाँ खालको समझदारीको प्रयास माओवादीले गरिरहेको छ । द्वन्द्वकालीन विषयलाई टुंगोमा पुर्याउन माओवादीलाई सकस भइरहेको छ । पहिले पनि शान्ति मिशन र शान्ति प्रक्रियासँग नजिक रहेर काम गरेका कृष्णप्रसाद सिटौलालाई अध्यक्ष स्वीकार्ने सम्भावना पनि छ ।