ओलीको निर्देशनपछि रोकिएको एमाले धादिङ अधिवेशन मंगलबार हुने

२२ माघ, काठमाडौं । नेकपा एमाले धादिङको नवौं जिल्ला अधिवेशन भोलि (मंगलबार) बाट सुरु हुने भएको छ । पार्टी अध्यक्ष केपी शर्मा ओलीले अधिवेशनमा कुटाकुट गर्ने नेतालाई काठमाडौं बोलाएर थर्काएपछि मंगलबार अधिवेशन हुने भएको हो । 

आइतबार दुई गुटका नेता कार्यकर्ताहरुबीच कुटाकुट हुँदा स्थगित भएको अधिवेशन मंगलबार बिहान सुरु गर्न लागिएको एमाले धादिङले जनाएको छ ।  बालकोटमा अध्यक्ष ओलीसँग भएको छलफलमा मंगलबार बिहानबाट पुनः अधिवेशनको कार्यक्रम सुरु गरिने सहमती भएको हो । एमाले धादिङका अध्यक्ष भूमि त्रिपाठीले अध्यक्ष ओलीले साना बिषयमै यस्ता झै झगडा नगर्न सुझाव दिएको बताए । 

त्रिपाठीका अनुसार आइतबार रोकिएको बन्दसत्रको कार्यक्रम सकिएपछि अधिवेशनको बाँकी प्रक्रिया सुरु हुनेछ । बालकोटको बैठकमा प्रदेश अध्यक्ष कैलाश ढुंगेल भने सहभागी थिएनन् । छलफलमा आफूलाई नबोलाइएको उनले बताए । प्रदेश अध्यक्ष ढुंगेलका अनुसार अब धादिङको अधिवेशनमा उनी सहभागी हुने छैनन् ।

शुक्रबारबाट सुरु भएको एमाले धादिङको अधिवेशनमा आइतबार नेताहरुबीचमै कुटाकुटको स्थिति सिर्जना भएको थियो । जिल्ला अध्यक्ष भूमि त्रिपाठीले जिल्ला कमिटीको निर्णय सुनाउँदै गर्दा जिल्लाकै एमाले नेता खेम लोहनी पक्ष बिरोधमा उत्रिएको थियो ।