सरकारी जग्गाकाे नक्कली कागजात बनाएर व्यक्तिका नाममा पार्ने २४९ जनाविरुद्ध अख्तियारले हाल्यो विशेषमा मुद्दा

२५ माघ, काठमाडौं । कैलालीको टीकापुर बजार क्षेत्रको ६ बिगाहा १८ कट्ठा १० धुर सरकारी जग्गा नक्कली कागजात बनाएर व्यक्तिका नाममा हक हस्तान्तरण गरी भ्रष्टाचार गरेको भन्दै अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।

टिकापुर नगर विकास समितिका तत्कालीन अध्यक्षहरू नेत्रप्रसाद जोशी, ललित ताम्राकार र धिरजराज रेग्मीको कार्यकालमा सरकारी जग्गा व्यक्तिको नाममा गरेको भन्दै अख्तियारले मुद्दा दायर गरेको हो । अख्तियारले दायर गरेको मुद्दामा टीकापुर क्षेत्रको ६ बिगाहा १८ कट्ठा १० धुर जग्गा व्यक्तिको नाममा गरी भ्रष्टाचार गरेको माग दाबी गरिएको छ । तत्कालीन अध्यक्ष जोशीले १२६ व्यक्तिको नाममा नामसारीको निर्णय गरी दुई करोड १२ लाख रूपैयाँ भ्रष्टाचार गरेको अख्तियारको ठहर छ । 

अर्का अध्यक्ष ताम्राकारले आठ जनाको नाममा नामसारीको निर्णय गरी ५९ लाख ३८० रूपैयाँ भ्रष्टाचार गरेको र तत्कालीन अध्यक्ष रेग्मीले ९ जनाका नाममा नामसारीको निर्णय गरी ६६ लाख ८९ हजार ८९२ रूपैयाँ भ्रष्टाचार गरेको ठहर गरेको छ । कुल विगो दुई करोड ५० लाख ६ हजार ८६९ दाबी गरी जग्गा खरिद गर्ने समेत २४९ जनालाई प्रतिवादी बनाएर मुद्दा दायर भएको छ ।