कांग्रेससँगको गठबन्धनमा पुर्नविचार गर्ने बेला आयोः प्रचण्ड

२९ माघ, काठमाडौं । प्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल प्रचण्डले कांग्रेसको गठबन्धन फाइदाजनक नभएको बताएका छन् । उनले कांग्रेसबाट माओवादीले जहिले पनि धोका मात्र पाएकाले समीक्षा हुनुपर्ने बताएका छन् । 

कोसी प्रदेशको चुनावी परिणाममा कांग्रेसबाट धोका भयो, जनयुद्ध दिवस मनाउने विषयमा पनि कांग्रेसले साथ दिएन, यसैले कांग्रेससँगको गठबन्धनमा सोच र समीक्षा गर्नुपर्ने बेला आएको उनले बताएका छन् । केन्द्रीय कमिटीको बैठकमा उनले कांग्रेसको गठबन्धनमा समीक्षा गर्ने बेला आएको बताएका हुन् । 

पार्टीले सञ्चालन गरेको चार महिने अभियानका सम्बन्धमा प्रदेश इन्चार्जहरुले पेश गरेको रिपोर्टमाथि सोमबारको बैठकमा प्रचण्डले मुलभूत रूपमा अभियान सफल भएको बताए । यस्तै उनले आगामी दिनमा पनि यस्ता खालका अभियानलाई निरन्तरता दिने जानकारी गराए । सो क्रममा प्रचण्डले आफू नेतृत्वको सरकारले गरेको काम कारबाहीका साथसाथै वर्तमान सत्ता गठबन्धनको विषयमा समेत धारणा राखेका थिए । 
 
प्रचण्डले कांग्रेससँगको गठबन्धन लाभदायक बन्न नसकेको ब्रिफिङ गरेको बैठकका एक सहभागीले बताए । ‘कांग्रेससँगको हाम्रो सहकार्य राजनीतिक दृष्टिकोणले त एउटा आवश्यकता हो । तर, हाम्रो पार्टीको समग्र विकासको दृष्टिकोणले त्यो लाभदायक भएको देखिएन’, प्रचण्डको भनाइ उद्धृत गर्दै उनले भने । 
 
यद्यपि उनले अर्को गठबन्धन बनाउने आधार भने तय भइनसकेको बैठकलाई बताएका थिए । अहिले शान्ति प्रक्रियाको बाँकी काम टुंग्याउन पर्ने अवस्थासहित विभिन्न परिस्थितिले नयाँ गठबन्धन बनाउने अवस्थामा नपुगेको उनको भनाइ थियो  । तर, यसबारे गम्भीर समीक्षा गर्नुपर्ने ठाउँमा भने पुगेको उनको धारणा थियो ।