मधेसका मुख्यमन्त्री यादवले विश्वासको मत लिनु अघि एमालेले समर्थन फिर्ता लिने

६ फागुुन, जनकपुरधाम । केन्द्रीय सत्ता गठबन्धनमा भएको सहमति अनुसार मधेस प्रदेशका मुख्यमन्त्री सरोजकुमार यादवले आइतबार विश्वासको मत लिने तयारी गरेका छन् । यादवले यसअघि गत जेठ १ गते मधेस सरकारमा रहेको एमालेले समर्थन फिर्ता लिएपछि मुख्यमन्त्री यादवले ३० औँ दिनमा जेठ ३० गते दोस्रोपटक विश्वासको मत लिएका थिए । 

आइतबार दिउँसो २ बजे बस्ने मधेस प्रदेशसभाको बैठकमा मुख्यमन्त्री यादवले विश्वासको मत लिन लागेकाे उनको सचिवालयले जनाएको छ । जनमत पार्टीले समर्थन फिर्ता लिएको एक महिनापछि मुख्यमन्त्री यादवले आज विश्वासको मत लिन लागेका हुन् । गएको माघ ९ गते जनमतले मधेस सरकारलाई दिएको समर्थन फिर्ता लिनुको साथै आफ्ना दुई मन्त्रीलाई फिर्ता बोलाएको थियो 

मुख्यमन्त्री यादवले आइतबार विश्वासको मत लिने भनेर मधेस प्रदेशसभा सचिवालयलाई गत बिहीबार नै पत्र पठाइसकेका छन् । कुनै पनि दलले सरकारलाई दिएको समर्थन फिर्ता लिए मुख्यमन्त्रीले आफ्नो बहुमत सिद्ध गर्न तीस तीनभित्र प्रदेश सभाबाट विश्वासको मत लिनुपर्ने संवैधानिक व्यवस्था छ ।

जसपा नेता यादव २७ पुस २०७९ मा नेकपा एमाले, माओवादी केन्द्र, जनमत, राप्रपा र नेपाल संघीय समाजवादी पार्टीका ६३ प्रदेश सभा सदस्यको समर्थनमा यादव मधेस सरकारको मुख्यमन्त्री नियुक्त भएका थिए। १०७ सदस्यीय मधेस प्रदेशसभामा बहुमतको लागि ५४ जना प्रदेशसभा सदस्यको समर्थन आवश्यक पर्छ । 

हाल एमाले र जनमत पार्टी यादवको विपक्षमा रहे पनि कांग्रेससहित सत्ता गठबन्धनमा रहेका दलको समर्थन उनलाई छ । प्रदेशसभामा बहुमत सिद्ध गर्न यादवलाई गाह्रो नरहेको जसपाका नेताहरूले बताएका छन् ।  

यसै बीच नेकपा एमालेले भने मधेश सरकारलाई दिएको समर्थन फिर्ता लिने तयारी गरेको छ । एमाले संसदीय दलका नेता सरोज कुमार यादवले सरकारको काम कारबाही सन्तोषजनक नभएको भन्दै समर्थन फिर्ता लिने निर्णय हुन सक्ने बताए ।

‘सरकारको गतिविधि त्यति सन्तोषजनक छैन । यस्तो सरकारलाई विश्वासको मत दिएर प्रतिपक्षको पनि मानमर्दन भइरहेको छ । त्यसैले आजको दलको बैठकबाट समर्थन फिर्ता लिने निर्णय हुन सक्छ,’ दलका नेता यादवले भने । एमालेले मुख्यमन्त्री यादवलाई दुई पटकसम्म विश्वासको मत दिँदै प्रमुख प्रतिपक्षीको बेन्चमा बस्दै आएको छ ।