द्वन्द्वमा घाइते भएकालाई जर्बजस्ती अवकाशमा पठाउने एआइजी गौतमको संकेत

८ फागुन, काठमाडौं । द्वन्द्वकालमा माओवादीसँगको भीडन्तमा परी घाइते भएका सशस्त्र प्रहरीका कर्मचारीप्रति सशस्त्रका एआईजी सीपी गौतमले निर्मम हुने संकेत गरेका छन् । केही दिन अघि अस्पताल व्यवस्थापन समितिको बैठकमा एआईजी गौतमले त्यस्ता कर्मचारीलाई जबर्जस्त अवकाशमा पठाउनुपर्ने बताएपछि सो संकेत देखिएको हो । यी कर्मचारी संगठनको लागि भार भएको उनको संकेत थियो । फौजमा शारीरिक रुपमा तन्दुरुस्त कर्मचारी चाहिन्छ, उनको तर्क थियो । जबकी तिनै कर्मचारीले आफ्नो ज्यानको समेत माया मारेर संगठन बचाएका थिए । बैठकमा सहभागी स्रोतका अनुसार उनीहरुले नमाने जबर्जस्त भएपनि अवकाश दिनुपर्ने उनको धारणा थियो ।

तर सशस्त्र प्रहरी महानिरीक्षक राजु अर्यालले केही दिन अघि वार्षिकोत्सवको अवसर पारेर अपाङ्गता भएका कर्मचारीलाई जम्मा ४ प्रतिशत ब्याजमा ऋण उपलब्ध गराउने र  बिना ब्याज अपांग मैत्री सामान किन्न एक लाखसम्म ऋण दिने बताएका थिए । आईजीपीको कर्मचारी प्रतिको माया र सुविधा दिनुपर्छ भन्ने मनसाय हुँदाहुँदै एआईजी गौतम त्यसलाई भाँड्ने खेलमा लागेको स्रोतको दावी छ ।

हिजो द्वन्द्वकालमा लडेका कर्मचारीको मनमा के पर्छ भन्नेसम्म एआईजी गौतमले हेक्का नराखेको हलचोकमा चर्चा छ । त्यसो त एआईजी गौतम संगठनको हरेक कार्यमा फरक मत राख्ने र अनावश्यक जान्ने बन्ने गरेको स्रोतको दावी छ । आईजीपी अर्याल आफ्ना कर्मचारीको हितमा सोच्ने तर गौतम त्यसको विरुद्ध उभिने गरेका छन् ।

केही समय अघि आईजीपी अर्यालले लामो समयसम्म पनि मिसन लगायतको अवसर नपाएकाले धेरै कर्मचारी बर्षौंसम्म काम गर्दा पनि सुशोभन तथा छातीमा तक्मा नभएकाहरुका लागि केही व्यवस्था गर्न लागेका थिए तर एआईजी गौतमले विमति राख्दै बनाउन लागिएको कार्यविधिलाई तहसनहस पारेको केही अधिकृतहरू बताउँछन् ।

‘एआईजी गौतम मानव स्रोत विभागमा आएपछि कर्मचारीको मनोबल खस्काउने मात्रै कार्य गरेका छन्’, हलचोक स्रोतले भन्यो ‘भोलि उहाँ पनि अवकाशमै जाने हो, अहिले कर्मचारीलाई दबाबमा राखेर भोलि बाटोमा भेटिँदा सलाम गर्ने पनि नहोलान् भन्ने संभावना बढ्दै जाला ।’