नागार्जुन घटनाः आत्महत्या गरेका राजु घिमिरेको शव पोष्टमार्टमका लागि पठाइने

९ फागुन, काठमाडौं । काठमाडौंको नागार्जुन नगरपालिका–६ भैरबटोलमा परिवारका तीन सदस्यको हत्या गरेर आत्महत्या गरेका राजु घिमिरेको शव पोष्टमार्टमका लागि त्रिवि शिक्षण अस्पताल पठाइने भएको छ ।

सोलुखुम्बुको दुधकुण्ड नगरपालिका घर भई नागार्जुन नगरपालिका–६ भैरबटोलमा बस्ने राजु घिमिरे भन्ने काजी बिकको शव घटनास्थलबाट पोस्टमार्टमका लागि पठाउन लागेको प्रहरीले जनाएको छ ।

प्रहरीले नागार्जुन नगरपालिका वडा नम्बर ५ स्थित हरिसिद्धको जंगलमा पुगेर उनले आत्महत्या गरेका हुन् । स्थानीयले काजी झुण्डिएको अवस्थामा देखेपछि प्रहरी कन्ट्रोलमा खबर गरिएसँगै जिल्ला प्रहरी परिसरको टोली घटनास्थलमा पुगेको थियो । घटनास्थलमा प्रहरी पुग्दा उनको मृत्यु भइसकेको थियो । स्थनीय सुधा तामाङले घटना देखेपछि बुधबार बिहान ११ बजेर १२ मिनेटमा प्रहरीलाई खबर गरेकी थिइन् ।

सीतापाइलामा रहेका श्रीमतीसहित दुई बालिकाको हत्या पछि उनी आत्महत्या गर्न भनेर हिँडेका थिए । काजीले ३८ वर्षीया श्रीमती ईश्वरी श्रेष्ठ,  ८ वर्षकी अनिशा श्रेष्ठ र साढे २ वर्षकी सिवानी श्रेष्ठको हत्या गरेका हुन् । अनिशा ईश्वरीकी छोरी हुन् भने सिवानी नातिनी हुन् ।