कांग्रेसको पदाधिकारी तथा पूर्व पदाधिकारी बैठक सकियो, आजै महासमिति बैठक टुङ्ग्याउने तयारी

१० फागुन, काठमाडौं । नेपाली कांग्रेसका पदाधिकारी र पूर्वपदाधिकारीहरुको बैठक महासमिति बैठक आजै समापन गर्ने गरी सकिएको छ । उक्त बैठकले महासमिति बैठक समापनको प्रक्रिया र विधि तय गर्दै भर्खरै सकिएको हो। बैठक गोदावरी भिलेज रिर्सोटमा आज बिहान बसेको थियो ।

बैठकको निर्णय अनुसार महासमितिको बन्द सत्रमा उठेका विभिन्न विषयहरू बारे सात प्रदेशका प्रदेश सभापतिले प्रदेशगत निष्कर्ष सुनाउने र त्यसलाई पार्टीको केन्द्रीय समितिको तर्फबाट उपसभापति पूर्ण बहादुर खड्काले सम्बोधन गरी बन्द सत्र अन्त भएको निष्कर्ष सुनाउने भएको छ ।

यस्तै समापन समारोहमा पदाधिकारी र पूर्व पदाधिकारीहरूलाई बढीमा पाँच मिनेटको छोटो मन्तव्य व्यक्त गर्न दिने र पार्टी सभापति शेरबहादुर देउवाले अन्तिममा सम्बोधन गर्ने निर्णय भएको छ । तर अधिकांश महासमिति सदस्यहरूले बोल्न पालो नपाएको भन्दै भोलिसम्म बैठक लम्ब्याउनु पर्ने माग चर्को रुपमा उठेको छ ।

महासमितिमा सहभागी २१ सय भन्दा बढी सदस्य मध्ये हालसम्म चार सय जनाले मात्र आफ्ना कुरा राख्ने अवसर पाएका छन् ।