ललितपुर मालपोतका नासुसहित पाँच जनाविरुद्ध भ्रष्टाचार मुद्दा दायर

११ फागुन, काठमाडौं । अख्तियार दुरुपयोग अनुसन्धान आयोगले ललितपुर नापी कार्यालयका सर्वेक्षक र मालपोत कार्यालयका नासुसहित ५ जनाविरुद्ध विशेष अदालतमा भ्रष्टाचार मुद्दा दायर गरेको छ । जग्गाको कित्ताकाट र नामसारी गरिदिने बहानामा सेवाग्राहीसँग घुस लिएको दाबीसहित अख्तियारले  ५ जनाविरुद्ध मुद्दा दायर गरेको हो । 

यसअघि उनीहरूलाई  २ लाख ५० हजार घुस लिएको अवस्थामा अख्तियारको टोलीले फागुन ९ गते पक्राउ गरेको थियो । नापी सर्वेक्षक रामवीर यादव, मालपोत कार्यालय ललितपुरका नासु प्रदीप पौडेल, बिचौलिया विनोद अधिकारी, लेखापढी व्यवसायी आशिषराज बस्नेत र लेखापढीको काम गर्ने दिनेश बन्जाराविरूद्ध विशेष अदालतमा मुद्दा दायर गरिएको आयोगका प्रवक्ता नरहरि घिमिरेले जानकारी दिए ।

उनीहरुले आपसी मिलोमतोमा २ लाख ५० हजार रुपैयाँ बराबरको घुस लिएको पाइएको अख्तियारको आरोप पत्रमा उल्लेख छ । सर्वेक्षक यादवविरुद्ध २ लाख ५० हजार, बिचौलिया अधिकारीविरुद्ध १ लाख ५० हजार, मालपोतका नायव सुब्बा पौडेलविरुद्ध १ लाख रुपैयाँ तथा लेखापढी व्यवसायी आशिषराज बस्नेत र लेखापढी काम गर्ने दिनेश बन्जाराविरूद्ध १ लाख रुपैयाँ माग दाबीसहित मुद्दा दायर गरिएको हो ।