राजनीतिक संस्कार नभएका प्रतिपक्षीसँग काम गर्न गाह्रो भयोः प्रधानमन्त्री

१२ फागुन, काठमाडौं । प्रधानमन्त्री पुष्पकमल दाहाल प्रचण्डले संसदका प्रतिपक्षी दलले कूराजनीतिक संस्कार देखाएको बताएका छन् । उनले प्रतिवेदन अध्ययन भइरहेका बेला बालकुमारी घटनालाई लिएर मन्त्रीको राजीनामा मागेर संसद अवरुद्ध गर्न खोज्नु प्रतिपक्षी दलको कूराजनीतिक संस्कार भएको बताएका छन् । 

बालकुमारी घटनाको प्रतिवेदन आफूले प्राप्त गरिसकेको र अध्ययनकै क्रममा रहेकाले यसको अध्ययन नसकि निर्णय लिन नमिल्ने उनको भनाइ छ । शनिबार बिहान माओवादी केन्द्रको संसदीय दलको बैठकमा  प्रधानमन्त्री प्रचण्डले अध्ययन पश्चात् सरकारले आवश्यक निर्णय लिने बताए । 

उनले भने, ’बालकुमारी घटनाको प्रतिवेदन अध्ययन गरेर निर्णय गरिन्छ । आयोग बनाएर छानविन गर्ने निर्णय सरकारकै हो । प्रतिवेदन अध्ययनको प्रक्रियामा छ । अध्ययन पश्चात् आवश्यक निष्कर्षमा पुग्छौँ । यो सरकारको क्षेत्राधिकार हो । प्रतिपक्षले राजनीतिक संस्कार देखाउनुपर्छ । कूसंस्कारको राजनीतिले कसैलाई फाइदा गर्दैन ।’ 

उनले आगामी मन्त्रिपरिषद बैठकपछि सरकारको तर्फबाट संसदमा विधेयकहरू प्रस्तुत गर्ने भएकाले प्रस्तुत विधेयकहरू पारित गराउन पार्टीका सांसदहरूलाई निर्देशन दिए । आउने क्याबिनेट बैठकमा छलफल गरेर संसदमा विधेयकहरू पेश गर्ने सरकारको तयारी छ । विधेयकहरू पारित गराउन तपाईँहरूले प्रभावकारी भूमिका खेल्नुहोस्’ उनले भने ।

बैठकमा प्रधानमन्त्रीले तीन करोडभन्दा साना योजना संघमा नराखी प्रदेश र स्थानीय तहमा पठाइने र संघीयतालाई बलियो बनाउन वित्तीय हस्तान्तरणमा जोड दिइएको धारणा राखेको सचिवालयको प्रेस नोटमा उल्लेख छ । ’बजेटमा कनिका छर्ने तरिकाले विकास र समृद्धि हासिल गर्न सकिँदैन। अलि रणनीतिक महत्वका योजना मात्र संघमा राख्छौँ । तीन करोडभन्दा साना योजना प्रदेश र स्थानीय तहले नै गर्छन् । बजेटको क्षेत्र तोकेर पठाइन्छ । आयोजना छनोटको अधिकार प्रदेश र स्थानीय तहलाई नै दिइन्छ’ उनले भने ।
 
नयाँ योजना धेरै नथपिकन पूरा हुन बाँकी पुराना योजनामा बजेट विनियोजन गरिने उनको भनाइ छ । ‘खर्च गर्न नसकिने शीर्षकमा बजेट थुपार्ने, अत्यावश्यक आयोजनामा बजेटका अभाव हुने बेथिति अन्त्य गर्नुपर्छ। पुराना योजना सम्पन्न गर्ने कुरामा सरकारको पुरै जोड रहन्छ,’ उनले भने ।