न्यायाधीश थपलिया र निरौलालाई बर्खास्त गर्न सिफारिस

१३ फागुन, काठमाडौं । न्याय परिषदले उच्च अदालतका न्यायाधीश नवराज थपलिया र जिल्ला अदालतका न्यायाधीश अम्बिकाप्रसाद निरौलालाई बर्खास्त गर्न सिफारिस गरेको छ ।

परिषदको आज आइतबार बसेको बैठकले उनीहरुको आचरण र कार्यक्षमतामा प्रश्न उठाइ बर्खास्तको सिफारिस गरेको हो । परिषदको अध्यक्ष सर्बोच्चका प्रधानन्यायाधीश रहने व्यवस्था छ । 

न्याय परिषद्का अध्यक्षसमेत रहेका प्रधानन्यायाधीश विश्वम्भरप्रसाद श्रेष्ठले सर्वोच्च अदालतका न्यायाधीश डा. आनन्दमोहन भट्टराईको संयोजकत्वमा न्यायाधीशद्वय प्रकाशकुमार ढुङ्गाना र तिलप्रसाद श्रेष्ठ विज्ञ सदस्य रहने गरी छानबिन समिति गठन गरेका थिए । 

उक्त छानबिन समितिको काम उच्च अदालतमा कार्यरत न्यायाधीश डा. नवराज थपलिया तथा जिल्ला अदालतमा कार्यरत न्यायाधीशहरू अम्बिकाप्रसाद निरौला, डा. परशुराम भट्टराई र राजकुमार कोइरालाको सम्बन्धमा थप छानबिन गरेको थियो । न्यायाधीश भट्टराइले भने यसअघि नै राजीनामा दिइसकेका छन् । यहि सिफारिसका आधारमा बर्खास्त गर्न सिफारिस गरिएको हो ।