संसद भवन परिसरभित्र प्रवेश गरेपछि लघुवित्त पीडितहरूलाई प्रहरीले लियो नियन्त्रणमा

१४ फागुन, काठमाडौं । सरकारलाई झकझक्याउन काठमाडौं आएका लघुवित्त पीडितहरू काठमाडौंको नयाँ बानेश्वरस्थित संघीय संसद भवन परिसरभित्र प्रवेश गरेका छन् । सोमबार दिउँसो उनीहरू संसद भवन परिसरभित्र प्रवेश गरेपछि उनीहरूलाई प्रहरीले नियन्त्रणमा लिएको छ ।  

उपत्यका प्रहरी प्रमुख एआईजी दिपक थापाका अनुसार, कम्तिमा १८ जनालाई पक्राउ गरेर प्रहरी वृत्त, बानेश्वर लगिएको छ । हामीलाई वार्तामा भित्रबाट बोलाएको भन्दै दुई/तीन जना छिरेपछि पछि अरु पनि छिरेका थिए । 

जबरजस्ती प्रवेश गरेकाले उनीहरुलाई नियन्त्रणमा लिइएको प्रहरीले जनाएको छ । सरकारले संघीय संसद वरपरका क्षेत्रलाई निषेधित क्षेत्र तोकेर प्रदर्शन गर्न निषेध गरेको छ । अझ संघीय संसदभित्र प्रवेश पास बिना जान दिइँदैन ।

लघुवित्त पीडितहरूले संसद परिसरमा छिरेर नाराबाजी गरेका थिए । उनीहरूलाई मर्यादापालकहरूले घेरेका भित्र जानबाट रोकेका थिए । जिल्ला प्रशासन कार्यालय काठमाडौंले लगाएको निषेधित क्षेत्र तोडेर लघुवित्त पीडितहरू संघीय संसद भवन परिसरमा प्रवेश गरेका हुन् ।

उनीहरूलाई प्रहरीले नियन्त्रणमा लिएको छ । उनीहरूले कालोसूची तथा धितो लिलाम फुकुवा गर्नुपर्ने, समाजवादी अर्थतन्त्रको विकास गर्नुपर्ने, गरिब किसानहरूलाई निःशुल्क ऋण प्रदान गर्नुपर्ने जस्ता माग राखेर प्रदर्शन गर्दै आइरहेका छन् ।