सशस्त्रद्वारा कैलालीमा १८ लाखको अवैध सामान बरामद

१७ फागुन, धनगढी । सशस्त्र प्रहरी बलले कैलालीमा साढे १८ लाख बढीको अवैध सामान बरामद गरेको जानकारी दिएको छ । यो १० दिनको अवधिमा बरामद गरिएको सामाग्री हो । सशस्त्र प्रहरीको नेपाल नं. ३४ गण हेडक्वार्टर कैलालीबाट खटिएको टोलीले बुधबार मात्र करिब आठ लाखको अवैध सामानसहित चार जना महिला नियन्त्रणमा लिएको जनाएको छ । 

सामान ओसारपसारमा संलग्न धनगढी उपमहानगरपालिका –२ पुरानो भन्सार रोड बस्ने महेश्वरी बिष्ट, तुलसी भट्ट, धना साउद र गौरी ओझालाई नियन्त्रणमा लिइएको सशस्त्र प्रहरी बल नेपाल नम्बर ३४ गणका प्रमुख खेम ठकुल्लाले बताए । प्रस्तावित सीमा सुरक्षा गुल्म त्रिनगरका सशस्त्र प्रहरी नायब उपरीक्षक (डीएसपी) बिलबहादुर फोजुको कमाण्डमा खटिएको टोलीले भारतबाट अवैध रुपमा ल्याइरहेको अवस्थामा लुगा कपडा तथा विभिन्न इलेक्ट्रोनिक सामान बरामद गरेको हो ।

सशस्त्रका अनुसार ६ फागनुदेखि १६ फागुनसम्मको १० दिनमा गण तथा मातहत प्रस्तावित सीमा सुरक्षा गुल्म र बीओपीबाट १८ लाख ५६ हजार रुपैयाँ बराबरको अवैध सामान बरामद गरी कारबाहीका लागि भन्सार बुझाइएको छ । एक लाख ३७ हजार बराबरको कुखुरा तथा माछा बरामद गरी नष्ट गरिएको सशस्त्र प्रहरीले जनाएको छ ।