मन्त्रीको आयु एकहप्ता मात्र, सेट नै फेर्ने सहमति

१७ फागुन, काठमाडौं । प्रधानमन्त्री पुष्पकमल दाहल प्रचण्ड नेतृत्वको मन्त्रिपरिषद हेरफेर हुने भएको छ । नेपाली कांग्रेस र माओवादीमा मन्त्रीको सेट नै परिवर्तन गर्ने सहमति भएको छ । प्रधानमन्त्रीका प्रेस सल्लाहकार गोविन्द आचार्यले मन्त्री हेरफेर गर्न अनौपचारिक रुपमा नाम मागिएको बताएका छन् । 

कांंग्रेस सभापति शेरबहादुर देउवाले उपसभापति पूर्णबहादुर खड्का नेतृत्वको टोलीलाई यसबारे छलफल गरी निर्णयमा पुग्न निर्देशन दिएका थिए । खड्का नेतृत्वको टोली र माओवादी नेताबीच भएको छलफलमा मन्त्रिमण्डल पुनर्गठन गर्ने समझदारी जुटेको हो ।

फागुन २१ गतेभित्र सबै मन्त्री हटाएर नयाँ नियुक्त गर्ने समझदारी जुटेपछि प्रधानमन्त्री प्रचण्डले बुधबार नै कांग्रेस लगायतका दलहरूसँग एक साताभित्र नाम मागेका थिए । प्रधानमन्त्री बाहेक सबै मन्त्री आगामी २० गतेभित्र हेरफेर गर्ने लगभग सहमति भएको बताइएको छ ।