शालिन पोखरेल मृत्यु प्रकरण : पोष्टमार्टमको रिपोर्टप्रति परिवारको आपत्ति

२० फागुन, काठमाडौं। शालिन पोखरेलको परिवारले छोरीको पोस्टमार्टमको रिपोर्टप्रति आपत्ति जनाएको छ। अघिल्लो शनिबार चितवनको रत्ननगर नगरपालिका– १० स्थित एकता शिशु निकेतको होस्टेलमा झुन्डिएको मृत अवस्थामा भेटिएकी १४ वर्षीया शालिनको काठमाडौंस्थित त्रिवि शिक्षण अस्पतालमा बुधबार पोस्टमार्टम भएको थियो।

आइतबार सार्वजनिक पोस्टमार्टमको रिपोर्टमा मृत्युको कारण ‘ह्याङ्गिङ’ उल्लेख गरिएको छ। त्यो भनेको मृत्युको कारण बलात्कार होइन भन्नु हो।

शालिनको परिवारले पोस्टमार्टम रिपोर्ट अहिलेसम्म नपाएको बताएको छ । ‘म अहिले अस्पतालमा नै छु, अहिलेसम्म हामीले रिपोर्ट पाएका छैनौँ’, शालीन बुबा दीपेन्द्र पोखरेल 'ललित'ले  टेलिफोन कुराकानीमा भने।

उनले मिडियामा सार्वजनिक भएको पोस्टमार्टम रिपोर्ट आफूलाई स्वीकार्य नभएको बताए। उनले यौनाङ्गमा घाउ भएको अवस्थामा मृत भेटिएकी छोरी बलात्कृत भएकी होइनन् भनेर पत्याउनै नसकिने उल्लेख गरे। र, प्रश्न गरे, ‘के..... !!! २६ जस्तै रातभरि होटलमा सुतेर आएपछि मात्र बलात्कार भएको हुने हो ?’