प्रधानमन्त्री प्रचण्डले सबै मन्त्रालयको जिम्मेवारी आफैसँग राख्ने

२१ फागुन, काठमाडौं । प्रधानमन्त्री पुष्पकमल दाहाल ‘प्रचण्ड’ सबै मन्त्रालयको जिम्मेवारी आफैंले राख्ने भएका छन् । राष्ट्रपति कार्यालयका अनुसार प्रधानमन्त्री प्रचण्डले सबै मन्त्रालयको जिम्मेवारी आफैंसँग राखेर तीन जनालाई विना विभागीय मन्त्री बनाएका छन् ।

प्रधानमन्त्रीको सिफारिसमा आज गठन भएको मन्त्रिपरिषद र त्यसको कार्य विभाजनअनुसार प्रधानमन्त्री प्रचण्डले नै अर्थ, उद्योग, वाणिज्य तथा आपूर्ति, ऊर्जा, जलस्रोत तथा सिँचाइ, कानुन न्याय तथा संसदीय मामिला, कृषि तथा पशुपन्छी विकास, खानेपानी, गृह, परराष्ट्र, भूमि व्यवस्था, सहकारी तथा गरिबी निवारण, भौतिक पूर्वाधार तथा यातायातलगायत नेपाल सरकार सबै मन्त्रालयको कार्यभार सम्हाल्ने भएका छन् । 

नवनियुक्त मन्त्रीहरूको शपथ ग्रहण सोमबार शीतल निवासमा भएको छ ।  राष्ट्रपति रामचन्द्र पौडेलले तीन जना नवनियुक्त मन्त्रीलाई पद तथा गोपनीयताको शपथ गराएका हुन् ।

राष्ट्रपतिले नेपालको संविधानका धारा, ७६ को उपधारा ९ बमोजिम प्रधानमन्त्री पुष्पकमल दाहाल ‘प्रचण्ड’को सिफारिसमा मन्त्रीमा नियुक्त भएका तीन जनालाई राष्ट्रपति कार्यालय शीतलनिवासमा आज आयोजित विशेष समारोहमा सोही संविधानको धारा, ८० अनुसार पद तथा गोपनीयताको शपथ गराए ।

 नेपाल कम्युनिष्ट पार्टी 'एमाले'का तर्फबाट पदम गिरी, नेपाल कम्युनिष्ट पार्टी 'माओवादी केन्द्र'का तर्फबाट हितबहादुर तामाङ र राष्ट्रिय स्वतन्त्र पार्टीका तर्फबाट डोलप्रसाद अर्यालले शपथ लिए । उनीहरुको कार्यभार अहिले तोकिएको छैन । राष्ट्रपति कार्यालयका अनुसार उनीहरुको कार्यभार पछि तोकिनेछ ।