सहकारीको पैसा हिनामिना गरेर अष्ट्रेलिया उडेका अनन्त मरासिनीले तिरे साँवा–ब्याज

२२ फागुन, काठमाडौं । स्याङ्जाकाे एक सहकारीका कोषाध्यक्षले हिनामिना गरेको करिब १५ लाख रुपैयाँ साँवा–व्याज फिर्ता भएकाे छ । पुतलीबजार नगरपालिका ११ जैसीडाँडामा रहेको स्याङजा शीत भण्डार सहकारी संस्था लि.का कोषाध्यक्ष अनन्त मरासिनीले हिनामिना गरेको १४ लाख १८ हजार रुपैयाँको ब्याजसहित फिर्ता गरेका हुन् । उनले ब्याज रकम ९७ हजार पनि फिर्ता गरेका छन् । सहकारी संस्थाका अध्यक्ष अनन्तकुमार श्रेष्ठका अनुसार मंगलबार मात्रै कोषाध्यक्ष मरासिनीले हिनामिनाकाे रकमसहित १५ लाख १५ हजार सहकारीको खातामा जम्मा गरेका छन् ।

कोषाध्यक्ष मरासिनीले सहकारीका अध्यक्ष अनन्तकुमार श्रेष्ठ र सचिव छायाँराम खनाललाई ठगेर रकम हिनामिना गरेको पाइएको छ । गरिमा विकास बैंक स्याङ्जा शाखाको चेकमार्फत उक्त रकम झिकेर उनले व्यक्तिगत र घरायसी प्रयोजनमा उपभोग गरेकाे पाइएको छ ।

उनले कार्यालयका कर्मचारी तलब र कार्यालय खर्च लगायतका बहानामा अध्यक्ष श्रेष्ठ र सचिव खनालद्वारा हस्ताक्षर चेकको दुरुपयोग गरेका हुन् । कहिले अध्यक्षलाई र कहिले सचिवलाई चेकमा हस्ताक्षर गराएर उनले उक्त रकम निकालेका थिए । 

कोषाध्यक्ष मरासिनीले पैसा हिनामिना गरेको थाहा पाएपछि गत माघ २५ गतेको  सञ्चालक समिति बैठकले स्पष्टीकरणसहित सात दिनभित्र पैसा फिर्ता गर्न निर्देशन दिएको थियो । तर, सञ्चालक समितिको निर्देशन र ताकेतालाई अटेर गर्दै उनी अष्ट्रेलिया पुगेका छन् । सञ्चालक समितिका साथीहरू र प्रहरीलाई समेत ढाँटेर उनी श्रीमतीसहित अष्ट्रेलिया पुगेका हुन् । 

हिनामिना गरेको कुरा यसरी बाहिरियो
‘यस्तो कसैलाई नहोस् ! सहकारी संस्थाकाे चेक चलाउने अधिकारसहित जिम्मेवार पदमा रहेको एकजना व्यक्तिले आफूखुशी सहकारीको रकम निकालेको थाहा भयो । सोधखोज गर्दा विदेशमा रहेको सन्तानले ‘म यहाँ घर किन्दै छु, जहाँबाट जसरी हुन्छ ३० लाख रुपैयाँ पठाउनुस्’ भनेकाले बाध्य भएर पठाउनु परेको भन्ने जवाफ आयो । त्यो रकम तुरुन्त जम्मा गर्न भनियो । तर, जम्मा गर्नु भएन । अब कानुनी कारवाहीको चरणमा जाँदैछ । आउने आइतबारसम्म जम्मा नभए प्रहरी हिरासतमा जानुपर्ने अवस्था छ । छोराछोरीलाई विदेशमा घर किन्न स्वदेशमा बाबुआमाले यो सास्ती ब्यहोर्नुपर्ने ! छोराछोरी, बाबुआमा सबैले समयमै सोचौं ! यो अवस्था कसैलाई नपरोस् ।’ उल्लेखित वाक्यांश सञ्चालक समितिका एक सदस्यले सामाजिक सञ्जाल फेसबुकमा लेखेका हुन् । यो स्टाटसले स्याङ्जाका सहकारीहरूमा हलचल ल्याएको थियो ।

चेक बाउन्स हुँदा पनि डराएनन् मरासिनी
आफूले हिनामिना गरेकाे रकम तिर्न फागुन ३ गतेका लागि सहकारीको नाममा चेक दिए । उनी अष्ट्रेलिया उड्ने मितिसम्मलाई ढाँट्नु थियो । चेकको नाटक गरे । ३ गतेको मिति रहेको चेक ७ गते मात्रै साटिने बताए । सञ्चालक समिति सहमत भए । तर, उनीहरू ७ गते हैन पहिलै गएर चेक बाउन्सतर्फ लागे । चेक नसटिएको जानकारी गराउन खोज्दा उनी सम्पर्कमा आएनन् ।

प्रहरीलाई समेत ढाँटेर अष्ट्रेलिया हुँइकिए
सहकारीका प्रबन्धक, कर्मचारी र सञ्चालक समितिले भेटघाट र फोनबाट रकम फिर्ता गर्न ताकेता गरेपछि उनी सम्पर्कविहिन हुँदै गए । विदेश जाने तयारी गर्दै छन् रे भन्ने गाँइगुई सुनेपछि सञ्चालक समिति जिल्ला प्रहरी कार्यालय स्याङजाको शरणमा पर्याे । जुन दिन सञ्चालक समिति प्रहरीमा गएकाे थियाे, त्यतिबेला उनी अष्ट्रेलिया उड्न विमानस्थल छिरिसकेका थिए । तारन्तार प्रहरीको फोनपछि बल्ल बल्ल उठेको उनको फोन प्रहरीलाई आज आउन सम्भव नहुने र भोलि परिवारसहित आउने भनेर फोन राखेका उनी जिल्ला प्रहरी कार्यालय होइन, त्यही दिन श्रीमतीसहित राति ११ बजे अष्ट्रेलिया हुँइकिए । समाचार लेखनको क्रममा उनीसँग सम्पर्क गर्न खोज्दा सम्पर्क हुन सकेनन् ।