साफ महिला च्याम्पियनसिपमा नेपाल र भारत भिड्दै

२४ फागुन, काठमाडौं । साफ यू–१६ महिला च्याम्पियनसिपमा नेपालले आज छिमेकी मुलुक भारतसँग प्रतिस्पर्धा गर्दैछ । खेल सातदोबाटो स्थित एन्फा कम्प्लेक्समा दिउँसो ३ बजे सुरु हुनेछ । चार टोली सहभागी यस च्याम्पियनसिपमा नेपाल र भारत दुवैको यो अन्तिम लिग खेल हो । 

यस खेलमा विजयी हुने फाइनल पुग्नेछ भने पराजित हुने टिम लिग चरणबाटै बाहिरिनेछ । त्यसैले घरेलु मैदानमा फाइनल खेल्ने लक्ष्य राखेको नेपालले त्यसका लागि यो खेल जित्नै पर्नेछ ।

दुई खेलबाट नेपाल र भारतको समान तीन अंक छ । दुवैले भुटानलाई पराजित गरेका थिए भने बंगलादेशसँग पराजित भएका थिए । नेपाल पहिलो खेलमै बंगलादेशसँग २–० ले पराजित भएको थियो भने त्यसपछि भुटानलाई ३–० ले पराजित गरेको थियो ।