नारी दिवसः घरेलु हिंसाका १६ हजार ५ सय १२ घटना दर्ता

♦ विशाल बस्नेत

२५ फागुन, महोतरी । अखिल नेपाल महिला संघ महोत्तरीले महिला दिवसको अवसरमा गृह मन्त्रालयलाई ज्ञापन पत्र बुझाएको छ ।

जिल्ला प्रशासन र इलाका प्रशासन कार्यालय मार्फत महिला हिंसा र विभेदप्रति ध्यानाकर्षण गराउँदै गृह मन्त्रालयलाई ज्ञापन पत्र बुझाएको हो ।

ज्ञापन पत्रमा लोकतान्त्रिक आन्दोलनको महत्वपूर्ण हिस्सा रहेको महिलाहरू अझै पनि कार्य स्थलमा हुने यौनजन्य दुर्व्यवहार, बेचबिखन, ओसारपसारका साथै संस्कृति र परम्पराका नाममा हुने हिंसा र आधुनिक प्रविधिको माध्यमबाट हुने हिंसामा प्रताडित बनिरहेको प्रति ध्यानाकर्षण जनाइएको छ ।

समाजका संवेदनहिन क्रियाकलापले गर्दा महिलाहरू बाँच्न पाउने अधिकारबाट समेत वञ्चित हुनुपरेको बताउँदै राज्य दायित्व निर्वाह गर्नबाट चुकेको अखिल नेपाल महिला संघ महोत्तरी कि अध्यक्ष सरस्वती चौधरीले बताइन । यिनै बिषय ध्यानाकर्षण गराउन पनि ज्ञापन पत्र दिनु परेको अध्यक्ष चौधरीको भनाई छ ।

महिला आन्दोलनको परिणामस्वरूप महिला  विरुद्ध हुने हिंसा नियन्त्रण र न्यूनीकरणका लागि संवैधानिक तथा कानुनी व्यवस्था भएतापनी अनुसन्धान प्रक्रियामा ढिलासुस्ती, कानुनी कार्यान्वयनमा आएको उदासिन्ताले पिडितले न्याय पाउने अवस्था न्यून देखिएकोप्रती महिला संघले गृहमन्त्रालयलाई ध्यानाकर्षण गराएको छ ।

विद्यालय, घर, कार्यालय, सार्वजनिक स्थल, कतै पनि महिलाहरूले सुरक्षाको अनुभूति गर्न नपाएको भन्दै उनीहरुले राज्यको जिम्मेवारीप्रति खबरदारी पनि गरेका छन ।

ज्ञापन पत्रमा महिलामाथि भएका हिंसा र अपराध जन्य क्रियाकलापको अभिलम्ब छानबिन गरि पिडितहरुलाई न्याय र उचित क्षतिपूर्तिको व्यवस्था गर्ने कामलाई प्रभावकारी बनाउन जोडदार माग गरिएको छ ।

आर्थिक बर्ष २०७९/८० मा प्रहरीमा परेका उजुरीलाई मात्र हेर्दा घरेलु हिंसाका १६ हजार ५ सय १२ घटना दर्ता भएका छन । यसैगरी जवरजस्ती करणीका घटना २ हजार ३ सय ८७, जवरजस्ती करणी उधोगका घटना ५ सय १८, अपहरण तथा जवरजस्ती करणीका घटना ५९ वटा, जवरजस्ती करणी पछि हत्या गरिएका ५, बोक्सीको आरोपका घटना ४३ वटा, मानव बेचबिखनका घटना १ सय २४ वटा, बहुविवाहका घटना ७ सय २३, बालविवाहका घटना ५२ वटा, छुवाछुतका घटना २७ वटा, तेजाब हानेको घटना ३, अवैध गर्भपतनका घटना ३२ वटा छन ।