दुई बजे अघि नै ४ लाखले गरे पशुपतिनाथको दर्शन

२५ फागुन, काठमाडौं । महाशिवरात्रीका अवसरमा दिउँसो २ बजेसम्ममा चार लाख बढी भक्तजनले पशुपतिनाथको दर्शन एवं पूजाअर्चना गरेका छन् । बिहान २ बजेदेखि नै पाशुपत क्षेत्रमा दर्शनार्थीको घुइँचो लागेको छ ।  

मध्य दिनसम्म पशुपतिनाथमा कम्तीमा पनि चार लाखभन्दा बढी भक्तजनले दर्शन गरेकाे पशुपति क्षेत्र विकास कोषका प्रवक्ता अधिकारीले जानकारी दिए । बिहानभन्दा अहिले दर्शनार्थीको भीड बाक्लिँदै गएको छ । भीड बढेसँगै सुरक्षाकर्मीलाई मेला व्यवस्थापन गर्न चुनौतीपूर्ण बनेको छ । भक्तजनको सहजताका लागि पशुपतिनाथका चारै ढोका बिहान २ बजेदेखि खोलिए पनि भीड भने घटेको छैन ।

दर्शन गर्ने पालो छिटो पाउने आसमा दर्शनार्थी रातीदेखि नै लामबद्ध भएर बसेका थिए । उनीहरू भने बिहानै दर्शन गरेर फर्किसकेका प्रवक्ता अधिकारीले जानकारी दिए । कोषले कम्तीमा २० लाख भक्तजनले आराध्य देव पशुपतिनाथको दर्शन गर्ने अनुमान गरेको छ ।