चेम्बर अध्यक्ष अग्रवाललाई एक्स्पोको रकम चेम्बर खातामा जम्मा गर्न बहुमत सदस्यहरूको आग्रह,अन्यथा न्यायिक निकाय गुहार्ने चेतावनी

२६ फागुन, दाङ । दाङ चेम्बर अफ कमर्सका पदाधिकारी, कार्य समिति सदस्य र पूर्व अध्यक्षसहितको केही दिन अघि बसेको बैठकले लुम्बिनी स्तरीय दाङ एक्स्पो २०८० को सबै खर्च कटाएर बचेको रकम १८ लाख रुपैयाँ चेम्बरको खातामा नरहेको भन्दै तत्काल जम्मा गर्न नेतृत्वलाई आग्रह गरेको छ । यसअघि चेम्बरको तर्फबाट अध्यक्ष विकास अग्रवाललाई लिखित रुपमै पत्राचार गरेर एक्स्पोबाट बचत रकम जम्मा गर्न आग्रह गरे पनि पुरै रकम बैंक खातामा नरहेकाले त्यस्तो आग्रह गरिएको हो ।

हाल ३ दिन भित्र सो रकम सबै जम्मा गर्न पत्राचार गर्ने निर्णय भएको बैठकमा सहभागी कार्य समिति सदस्य तथा दाङ महिला चेम्बर कि अध्यक्ष सरिता देवकोटाले बताइन् । चेम्बरका जिल्ला उपाध्यक्ष द्वय लक्ष्मी अधिकारी, रेशमराज गिरिसहित नेपाल चेम्बर अफ कमर्स लुम्बिनी प्रदेशका उपाध्यक्ष श्रीधर महरा, दाङ चेम्बरका पूर्व अध्यक्ष बलदेव योगी, पूर्व पदाधिकारी घनश्याम  अधिकारीसहितको बैठकले तीन दिन भित्र चेम्बरले पाउनु पर्ने रकम आफ्नै खातामा जम्मा नभए जिल्ला प्रशासनसहित न्यायिक निकायमा जाने पनि निर्णय भएको देवकोटाले बताइन ।

उनले चेम्बरको अध्यक्षलाई जोडेर आएको ७० लाखको सम्झौताको बारेमा लिखित रुपमै स्पष्ट पार्न आग्रह गर्ने पनि निर्णय भएको बताइन । बैठकमा चेम्बरका जिल्ला अध्यक्ष अग्रवालसहित महासचिव, कोषाध्यक्ष उपस्थित नरहेको उनले बताइन । घोराहीमा चेम्बरले माघ २३ गतेदेखि फागुन ८ गतेसम्म गरेर १५ दिन एक्स्पो सन्चालन गरेको थियो । यता यो बारेमा बुझ्न पटक–पटक ९८४७८४१८६०  फोन गर्न खोज्दा चेम्बरका जिल्ला अध्यक्ष अग्रवालले फोन उठाएनन् ।