कांग्रेसको प्रस्ताव अनुसार राष्ट्रिय सभाको अध्यक्षको निर्वाचन नसर्ने

२७ फागुन, काठमाडौं । नेपाल कांग्रेसले राष्ट्रिय सभाका अध्यक्षको निर्वाचन सार्न गरेको प्रस्ताव अमान्य भएको छ । फागुन २९ गतेका लागि तय भएको राष्ट्रिय सभा अध्यक्षको निर्वाचन सार्ने कांग्रेसले प्रस्ताव गरेको थियो । 

आइतबार बिहान संसद भवन नयाँ बानेश्वमा बसेको राष्ट्रिय सभामा प्रतिनिधित्व गर्ने दलहरुको बैठकमा राष्ट्रिय सभामा कांग्रेसको संसदीय दलको नेता कृष्ण सिटौलाले केहि दिन अध्यक्षको निर्वाचन सार्ने प्रस्ताव गरेका थिए । अन्य दलहरुले नमानेपछि तोकिएकै मिति फागुन २९ गते अध्यक्षको निर्वाचन हुने भएको छ ।

यसअघि राष्ट्रिय सभाको कार्य व्यवस्था परामर्श समितिको बैठकले स्वीकृत गरेको कार्यतालिकामा फागुन २७ गते राष्ट्रिय सभाको अध्यक्षको निर्वाचनको दिन र समय निर्धारण गर्ने र २९ गते निर्वाचन गर्ने उल्लेख छ । यही अनुसार जाने निर्णय भएको नेताहरुले जानकारी दिए ।

राष्ट्रिय सभाको बैठक आज आइतबार दिउँसो १ बजेर ९ मिनेटमा बोलाइएको छ । जहाँ अध्यक्षका चुनावको मिति घोषणा गरिने छ । कांग्रेसले आफूहरुलाई नसोधिएकको र थप तयारी गर्नुपर्ने भन्दै निर्वाचन सार्न प्रस्ताव गरेको हो ।