ग्याल्पो ल्होसारको सार्वजनिक बिदा, दुनियाँ हसाउँने सरकारी निर्णय

२८ फागुन, काठमाडौं । शेर्पा समुदायको सांस्कृतिक पर्व ग्याल्पो ल्होसारको सार्वजनिक विदालाई लिएर सरकारमाथि विभिन्न टीकाटिप्पणी सुरु भएका छन् । कतिपयले सरकारले शेर्पा संस्कृतिमाथि अपमान गरेको दावी गरेका छन् । विदा मनाउनुपर्ने शेर्पा समुदाय सरकारले दिएको विदालाई लिएर आफै अचम्ममा परेको छ ।

आजको विदा एक महिना अगाडि नै दिनुपर्ने थियो । तर, चाड सकिएको एक महिनापछि आएर आज सार्वजनिक बिदा दिएपछि सरकार हाँसोको पात्र बनेको छ । गत माघ २७ गते नै मनाइसकेको चाडलाई अहिले बिदा र शुभकामना दिएर सरकारले के गर्न खोजेको भन्दै शेर्पा समुदाय नै छक्क र आर्श्चर्यमा परेको छ । 

आजको विदाबारे लोकतान्त्रिक शेर्पा संघका अध्यक्ष नाम्गेल शेर्पाले भने ‘सोनाम र ग्याल्पो ल्होसार एक महिना अगाडि नै मनाइएको हो । आज कुनै चाड छैन । हामी आफै अचम्ममा परेका छौ । शेर्पाको संस्कृतिबारे सरकारलाई जानकारी नभएर हुनसक्छ ।’

यो भन्दा लापरबाही अरु के हुन्छ ? ल्होसार र सोनाम ल्होसार गत माघ २७ गते एकै दिन परेको भन्दै त्यही दिन शेर्पा समुदायले ग्याल्पो ल्होसार मनाएका थिए । नेपाली कांग्रेसकी महासमिति सदस्य शारदा लामाले आफूहरू पनि एक महिनाअघि मनाएको पर्वको आज सार्वजनिक विदा र सरकारले शुभकामना दिएको देख्दा अचम्म लागेको बताइन् । 

आज प्रधानमन्त्रीदेखि प्रतिनिधिसभाका सभामुखसम्मले ल्होसार पर्वलाई कम खर्चिलो र लोप हुन लागेका परम्परा जगेर्ना गर्दै मौलिक पर्वका रुपमा मनाउन प्रेरणा मिलोस् भन्दै कामना गरेका छन् । आज जारी शुभकामना सन्देशमा हिमाली आदिवासी शेर्पा समुदायको नयाँ वर्ष २१५१ औँ ग्याल्पो ल्होसार (डुक ल्हो)को अवसरमा स्वदेश तथा विदेशमा रहनुभएका सम्पूर्ण नेपालीमा सुख, शान्ति, समृद्धि र सुस्वास्थ्यको कामना गर्दै उक्त शुभकामना भनिएको छ ।