कलैयाबाट सवारी चालक अनुमति पत्र वितरणको काम शुरु

२९ फागुन, वीरगञ्ज । यातायात व्यवस्था कार्यालय बाराले अव कलैयाबाट सवारी अनुमतिपत्र 'लाईसेन्स' वितरण गर्ने भएको छ । २०८० मंसिर २५ मा कार्यालय स्थापना भएसँगै  पहिलो पटक लाइसेन्स दिने काम अगाडी बढेको छ । 

मधेश प्रदेश यातायात व्यवस्था कार्यालय कलैयाबाट लाइसेन्स वितरणको प्रकृया अगाडि बढाएको कार्यालय प्रमुख नवाज हुसैनले  जानकारी दिए । यस अघि सवारी दर्ता, लाइसेन्स नवीकरणको काम मात्रै हुने गरेकोमा अव लाइसेन्स नै वितरणको जिम्मेवारी पाएको कार्यालय प्रमुख हुसेनले बताए ।

उनका अनुसार अव मोटरसाइकल  स्कुटीदेखि जीप, कार, अटो रिक्सा ट्रयाक्टर जस्ता हलुका सवारी साधनको लाइसेन्स वितरण गर्ने अधिकार कार्यालयले पाएको बताए । अधिकार पाएसँगै लाइसेन्सका लागि फाराम खुल्ला भइसकेको पनि हुसेनले जानकारी दिए । अव भटाभट लाइसेन्स वितरणको कार्य सुरु हुने उनले बताए । लाइसेन्स वितरणका लागि आवश्यक पूर्वाधारसमेत कार्यालयले निर्माण गरिसकेको हुसेनले बताए ।

कार्यालय नजिकै रहेको गंगापुर ३ स्थित  ‘सवारी ट्रायल सेन्टर’ निर्माण भइसकेको छ । नेपाल सरकारलाई कुनै भार नपर्ने गरी सो सवारी ट्रायल सेन्टर संचालनमा आएको कार्यालय प्रमुख हुसेनले बताए ।

सुरुमा हलुका सवारीको लाइसेन्स वितरण गर्ने र विस्तारै सबैखाले वितरण गर्ने नीति लिइने कार्यालयले जनाएको छ । यसअघि यातायात कार्यालय बारालाई लाइसेन्स वितरणको अधिकार नहुँदा जिल्लाका हजारौँ सेवाग्राही वीरगञ्ज पुग्नुपर्ने बाध्यता हटेको छ 
।