प्रभु बैंकका डेपुटी सीईओ न्यौपानेसहित ११ जनालाई थप ५ दिन हिरासत राखिने

२८ फागुन, काठमाडौं ।  उच्च अदालत पाटनले कमसल धितोमा बढी कर्जा प्रवाह गरेको आरोपमा पक्राउ परेका प्रभु बैंकका वरिष्ठ डेपुटी सीईओ मनोज न्यौपानेसहित ११ जनालाई थप ५ दिन हिरासतमा राख्न प्रहरीलाई अनुमति दिएको छ । 

सीआईबीले १५ माघमा न्यौपानेसहित सेञ्चुरी बैंकका पूर्वसीईओ तुलसी गौतम, कर्मचारी राजेश भण्डारी, दिलीप बराल, सुवासबहादुर श्रेष्ठ, अनुपमा श्रेष्ठ मानन्धर, सविन घिमिरे, रमन श्रेष्ठ, दीपेश प्रधान, र सुनिल बस्नेतलाई पक्राउ गरेको थियो ।

उनीहरुले सेन्चुरी बैंकमा रहँदा कमसल धितोमा दुई अर्ब ११ करोड ६५ लाख ५५ हजार रुपैयाँ बराबरको कर्जा प्रवाह गरेको अनुसन्धानबाट देखिएको थियो । यो धितोभन्दा ९७ करोड ४१ लाख ७० हजार ७ सय ७२ रूपैयाँले बढी भएको पाइएको थियो ।

यस विषयमा प्रहरीले बैंकिङ कसुर तथा सजाय ऐन, २०६४ बमोजिम अनुसन्धान गरिरहेको छ । अदालतले पक्राउ परेका ११ जनालाई थप ५ दिन हिरासतमा राख्न अनुमति दिएको केन्द्रीय अनुसन्धान ब्यूरो (सीआईबी) ले जनाएको छ । 

सेन्चुरी बैंकमा रहँदा कमसल धितोमा कर्जा प्रवाह गरेको अभियोग उनीहरूमाथि लागेको छ । सेन्चुरी बैंक अहिले प्रभु बैंकमा गाभिइसकेको छ । सीआईबीले नेपाल राष्ट्र बैंकको पत्रका आधारमा उनीहरूलाई पक्राउ गरेको थियो । बैंकका कर्मचारीको मिलोमतोमा एक अर्ब रुपैयाँको ओभर भ्यालुएसनमा ऋण प्रवाह भएको प्रहरीको अनुसन्धानमा देखिएको छ ।

सीआईबीले गरेको अनुसन्धान अनुसार प्रवाह भएको ऋणमध्ये ९९ करोड १९ लाख रुपैंया धितोले खाम्ने भन्दा बढी अर्थात् ओभर भ्यालुएसन भएको देखिएको हो । २०७७ सालमा बैंकले देउराली सहकारी मार्फत ऋण प्रवाह गरेको थियो र देउराली सहकारीका संचालकहरुलाई कमसल धितोमा क्षमताभन्दा बढी ऋण प्रवाह गरेको र त्यो ऋण डुबेको आरोपमा संलग्न कर्मचारीहरूलाई पक्राउ गरिएको थियो । 

यो पनि पढ्नुहोस