एक दिन राप्रपाले यो गणतन्त्र उल्टाइदिन्छः लिङ्देन

३० फागुन, काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले यस्तै किचलो भइरहे गणतन्त्र फाल्ने दिन आउने बताएका छन् । उनले राप्रपाले बहुमत पुर्याएका दिन गण्तन्त्र पल्टाइदिने चेतावनी दिएका छन् । 

बुधबार प्रतिनिधिसभा बैठकमा प्रधानमन्त्री पुष्पकमल दाहाल प्रचण्डले राखेको विश्वासको मतको प्रस्तावमाथि छलफलमा भाग लिँदै लिङ्देनले गणतन्त्रमाथि सधैं फोहोरी खेल भइरहे यसलाई ढालिदिने चेतावनी दिए ।

लिङ्देनले सत्तालाई आफ्नो सुरक्षा कबजका रुपमा प्रयोग गर्ने उद्देश्यले नयाँ गठबन्धन बनेको बताए । उनले नयाँ गठबन्धन स्वार्थको गठजोड भएको बताए । ‘त्यो सत्ता निर्माण हुँदा गरेको ८ बुँदे, ७ बुँदेबाट पनि त्यही कुरा देखिन्छ,’ उनले भने, देश र जनताको वर्तमान परिस्थितिलाई केन्द्रमा राखेर यो सरकार बनेको होइन ।’

उनले आफूहरूको संख्या सानो भएपनि गणतन्त्रको नाममा लुटतन्त्र मच्याइरहेको बताए । उनले नयाँ सत्ता समीकरणमा आफू सहभागी नहुने स्पष्ट पारे । उनले भने, ’हामीले ल्याएको व्यवस्था भनेर गणतन्त्रको जसरी व्याख्या गरिरनु भएको छ । पछिल्लो समय गणतन्त्रको नाममा जुन प्रकारको लुटतन्त्र भइरहेको छ । त्यो लुटतन्त्र नै गणतन्त्र हो भने त्यो गणतन्त्रको हामी सधैं विरोध गर्छौं । सडकमा विरोध गर्छौं । सदनमा विरोध गर्छौं । जुन बेला हैसित पुग्छ त्यत्तिबेला पल्टाइदिन्छौं । त्यतिबेला हाम्रो मुख थुन्न सक्नुहुन्न ।’

उनले संसदमा उभिएर राजा र धर्मका नाममा गाली गर्ने छुट कसैलाई नभएको जिकिर गरे। राप्रपा अध्यक्ष लिङ्देनले नयाँ गठबन्धन स्वार्थहरूको गठबन्धन भएको आरोप लगाए। जतिसुकै सिद्धान्त र दर्शनको लेप लगाए पनि नयाँ सत्ता हेरफेर स्वार्थको जोडघट भएको भन्दै उनले स्वार्थ मिले टास्सिने नमिले छुटिने बताए । उनले प्रधानमन्त्री प्रचण्डलाई विश्वासको मत नदिने बताए ।