रौतहटमा दिउँसै गोली चल्यो, लुटेरा समूह तत्काल पक्राउ गर्न प्रहरी सफल

२ चैत, काठमाडौं । दिउँसै मनि ट्रान्सफर लुट्न आउने समूहलाई रौतहट प्रहरीले भाग्दै गर्दा सीमा नाकाबाट पक्राउ गरेको छ । आज दिउँसो करिब साढे एक बजेको समयमा रौतहटको इशनाथ नगरपालिका वडा. न ७ को खापड चोकमा रहेको शिवम् मनि ट्रान्सफर लुट्न आएका लुटेरा समूहलाई प्रहरी टोलीले पक्राउ गरेको हो ।

पक्राउ पर्नेमा भारतको विहार मोतिहारीका मुनिफ कुमार यादव र राज कुमार पासवान रहेका छन् । सो भारतीय लुटेरा समूहले मनि ट्रान्सफरका सञ्चालक नितेश साहमाथि गोली प्रहार गर्दा उनको कानमा गम्भीर चोट लागेको प्रहरीले जनाएको छ । नितेशमाथि लुटेरा समूहले टाउकोमा तोकेर गोली प्रहार गरे पनि उनको कानमा लागेको हो । 

उनीहरुको साथबाट कटुवा पेस्तोल र बीआर ०६ सीएल ९७९६ नम्बरको. अपाची मोटरसाइकलसमेत बरामद भएको छ ।  घाइते साहलाई  उपचारका लागि वीरगञ्ज पठाइएको छ । लुटेराको समूहले लुटपाट गर्ने उद्देश्य गोली चलाएको प्रहरीको भनाइ छ ।

लुटेरा समूहले उक्त मनि ट्रान्फरबाट कति रकम लुट्यो भन्ने एकिन भएको छैन । घटनाबारे विस्तृत अनुसन्धान बाँकी नै रहेकाले सबै विवरण आउन बाँकी रहेको जिल्ला प्रहरी कार्यालय रौतहटले जनाएको छ ।