काली कम्बल वाले बाबा फरार, आयोजकलाई समात्न खोज्दा झडप

४ चैत, वीरगञ्ज । सबै रोगको उपचार गर्ने दाबी गर्दै आएका भारतीय काली कम्बल वाले बाबा फरार भएका छन् । वीरगञ्जको चिनीमिल परिसरमा फागुन ३० गतेदेखि चैत १० गतेसम्म धार्मिक शिविर सञ्चालन गर्न आएका काली कम्बल वाले बाबा फरार भएका हुन् । 

क्यान्सर, सुगर, रक्तचाप, पत्थरी लगायतका विभिन्न रोगको निःशुल्क उपचार गर्ने भनी सर्वसाधारणलाई ठगी गर्दै आएका बाबाको पोल खुलेपछि फरार भएको जिल्ला प्रहरी कार्यालय पर्साका प्रमुख प्रहरी उपरीक्षक कुमोध ढुङ्गेलले  बताए । 

धर्मको आडमा सर्वसाधारणलाई निको बनाउने बहानामा ठगी गर्दै गरेको खबरपश्चात प्रहरीले पक्राउ गर्ने पूर्व सूचना पाएपछि बाबा फरार भएको हुन सक्ने प्रहरीको आशंका छ ।

बाबा फरार भएसँगै आयोजकलाई नियन्त्रणमा लिन खोज्दा स्थानीय र प्रहरीबीच झडप समेत भएको थियो । यसअघि भारतमा पनि उनलाई विभिन्न आरोप लाग्दै आएको थियो ।