गृहमन्त्री लामिछानेमाथि छानविन गर्न संसदीय छानबिन समिति गठन गरिनुपर्छः कांग्रेस

६ चैत, काठमाडौं । नेपाली कांग्रेसले उपप्रधान तथा गृहमन्त्री रवि लामिछानेबारे उठेका प्रश्नबारे छानबिन गर्न संसदीय छानबिन समिति गठनको माग गरेको छ । मंगलबारको प्रतिनिधि सभा बैठकमा कांग्रेस प्रमुख सचेतक रमेश लेखकले प्रधानमन्त्रीले दिएको जवाफप्रति असन्तुष्टि जनाउँदै छानबिन समिति गठनको माग गरेका हुन् । 

लेखकले संसद्मा प्रश्न उठाइएपछि मन्त्रीले राजीनामा दिएका चार उदाहरण प्रस्तुत गरेका छन् । जाहेरी परेकै आधारमा सदनमा प्रश्न गरिँदा मन्त्रीले राजीनामा दिनु नपर्ने भन्दै प्रधानमन्त्री प्रचण्डले जवाफ दिएपछि उनले विगतका उदाहरण प्रस्तुत गरेका हुन् । 

‘प्रधानमन्त्रीजीले नेपाली कांग्रेस संसदीय अभ्यासको लामो अनुभव भएको बताउनुभयो । हामीलाई हाम्रो इतिहास स्मरण छ । मन्त्रीका विषयमा यो सदनमा विगतमा पनि प्रश्न उठेको छ । डा. रामशरण महतको विदेशी बैँकमा खाता छ, राजीनामा दिनुपर्छ भनेर संसद्मा आवाज उठ्यो, उहाँले राजीनामा दिनुभयो । शेरबहादुर तामाङको बोलीका विषयमा प्रश्न उठ्यो, उहाँले राजीनामा दिनुभएको छ ।  गोकुल बाँस्कोटा यही हुनुहुन्छ, उहाँको विषयमा प्रश्न उठेपछि राजीनामा दिनुभएको छ’, उनले भने । 

प्रश्न उठाइएकै कारण पछिल्लो पटक जनार्दन शर्माले राजीनामा दिएको उनले उल्लेख गरे । विगतमा अरू मन्त्रीका विषयमा पनि प्रश्न उठाइएपछि संसदीय छानबिन समिति गठन गरिएको उनले बताए । अहिले प्रधानमन्त्रीको दाबीका कारण पनि छानबिन समिति आवश्यक भएकामा उनले जोड दिए ।

भरतमोहन अधिकारीले बजेट ल्याउँदा कतिपय विषय बाहिरिएको भनेर संसदीय छानबिन समिति बनेको छ । विष्णु पौडेलको बजेटको सूचनाका विषयमा पनि प्रश्न उठेपछि संसदीय छानबिन समिति गठन गरिएको छ, लेखकले भने ।
 
‘एउटा छानबिन समिति गठन गरौँ, दूधको दूध पानीको पानी हुन्छ’, नेता लेखको माग छ । नेता लेखकले प्रधानमन्त्रीले लामिछानेलाई कारबाही गर्न प्रमाण नभएको भने पनि पर्याप्त प्रमाण रहेको दाबी समेत गरे । उनले गृहमन्त्री रवि लामिछानेमाथि सहकारी प्रकरणमा अनुसन्धान गर्न पर्याप्त प्रमाण भएको बताए ।

लामिछानेमाथि अनुसन्धान गर्नु नपर्ने प्रहरीको ब्रिफिङ रहेको प्रधानमन्त्रीले बताएपछि यस भनाइमा असन्तुष्टि जनाउँदै कांग्रेसले पर्याप्त प्रमाण भएको दाबी गरेको हो । प्रधानमन्त्रीलाई नै गलत जानकारी दिएको उनले बताए । ‘गलत सूचना प्राप्त हुँदैछ । प्रधानमन्त्रीजी नै अँध्यारोमा हुनुहुन्छ भने यो कुराको निष्पक्ष छानबिन होला, उनले प्रश्न गरे, ‘प्रधानमन्त्रीजीले भन्नुभयो प्रमाण छैन । पोखरा महानगरले सूर्यदर्शन सहकारीबाट गोर्खा नेटवर्क प्रालिका नाममा रवि लामिछानेको नाममा पुलेसो कर्जा नम्बर ११६–४४५६ खडा गरी खाता नम्बर ४९–००७७० मार्फत पेश्की फर्स्यौट गर्यो भनेर लेखेको यो प्रमाण होइन ? ।’