जीवन चलाउनेको कुरालाई आधार मानेर सीआईबी प्रमुख ज्ञवालीमाथि कारवाही चलाउन सकिन्नः आईजीपी

१४ चैत, काठमाडौं । नेपाल प्रहरीका प्रमुख आईजीपी बसन्तबहादुर कुँवरले जीवन चलाउनेले भनेकै आधारमा सीआईबी प्रमुख एआईजी श्याम ज्ञवालीमाथि कारवाही चलाउन नमिल्ने बताएका छन् । राज्य व्यवस्था तथा सुशासन समितिको बैठकपछि सञ्चारकर्मीसँग कुरा गर्दै उनले हालका सीआईबी प्रमुख ज्ञवालीले आईजीपी बन्ने प्रतिस्पर्धामा दुई करोड मागेको भन्ने दाबी नपुग्ने बताए । 

उनले सुन तस्करी प्रकरणका फरार आरोपी जीवन चलाउनेले सञ्चारमाध्यममा सार्वजनिक गरेका अभिव्यक्तिलाई तथ्यका रुपमा लिन नसकिने र चलाउने आफै अनुसन्धानमा रहेको बताए । चलाउनेले सुन प्रकरण अनुसन्धानमा खटिएका एसपी सञ्जयसिंह थापा र डीएसपी दुर्गा दाहालले पनि ६० लाख रुपैयाँ मागेको तर, नपाएपछि आफूलाई प्रतिवादी बनाएको दाबी गरेका थिए ।

महानिरीक्षक कुँवरले यसमा आधार नभएको बताए । त्यसअघि उनले पोखराको सूर्यदर्शन सहकारी ठगीका मुख्य आरोपी गितेन्द्रबाबु राई (जीबी) मलेसियामा रहेको भन्दै सहकारी ठगीको मुख्य आरोपी नै जीबी भएको खुलेको बताएका थिए । समितिका सदस्यहरूले उठाएको प्रश्नको जवाफ दिँदै कुँवरले प्रहरीको अन्तर्राष्ट्रिय अपराध संगठन इन्टरपोलमार्फत् रेड नोटिस जारी हुँदा पनि मलेसिया सरकारको असहयोगका कारण पक्राउ गर्न नसकिएको बताए ।

सहकारीसँग जोडिएका गृहमन्त्री रवि लामिछानेको नाम जोडिए पनि कुनै प्रमाण फेला नपरेको उनले स्पष्ट पारे । कुँवरले पूर्व सभामुख एवं माओवादी उपाध्यक्ष कृष्णबहादुर महराका गतिविधि शंकास्पद देखिएपछि पक्राउ गर्नुपरेको बताए ।

सांसदले उठाएका प्रश्नमा महानिरीक्षक कुँवरले महराले पीएसओ र गाडी छोडेर हिँडेपछि पक्राउ गरिएको बताए । माननीय कृष्णबहादुर महराको विषय छ । आयोगको सिफारिस अध्ययन गर्यौँ । उहाँको स्वास्थ्यका कारण लिवरल हुने नै भन्ने थियो । तर, हामीलाई आभास भयो कि पक्राउ गर्नुपर्ने हो कि भन्ने त्यसैले ल्याइएको हो,आईजीपी कुँवरले भने, पीएसओ र गाडी छोडेर हिँड्नुभएको अवस्था थियो । त्यसपछि पक्राउ आवश्यक देखियो । 

उनले अदालतले नै अस्पतालमा राखेर अनुसन्धान गर्नु भनेपछि हाजिरी जमानीमा छोडिएको बताए । अदालतले पनि अस्पतालमै राखेर मुद्दाको कारबाही अघि बढाउनु भनेको र हिरासतमा बस्दा बस्दै अर्को घटना नहोस् भनेर छाडिएको हो, कुँवरले भने, हामी दबाब र प्रभावमा परेको होइन ।