कांग्रेस संसदीय बोर्ड र कार्य सम्पादन समितिको बैठकले इलाम र बझाङको उम्मेदवार टुंगो लगाउने

२० चैत, काठमाडौं । नेपाली कांग्रेसले इलाम क्षेत्र नं २ र बझाङ १ (क) मा हुने उपनिर्वाचनका लागि आज उम्मेदवारको टुंगो लगाउने भएको छ । यी क्षेत्रमा आगामी वैशाख १५ गते उपनिर्वाचन हुँदैछ । उम्मेदवार टुंगो लगाउन कांग्रेसले संसदीय बोर्ड र कार्य सम्पादन समितिको बैठक बोलाएको छ । 

संसदीय बोर्डको बैठक दिउँसो २ बजे र कार्य सम्पादन समितिको बैठक दिउँसो ३ बजे पार्टी सभापति शेरबहादुर देउवाको निवास बूढानीलकण्ठमा बस्नेछ । संसदीय बोर्डको बैठकले गरेको निर्णय कार्य सम्पादन समितिको बैठकले अनुमोदन गर्ने छ ।

आगामी वैशाख १५ गते इलाम क्षेत्र नम्बर २ मा प्रतिनिधि सभा सदस्यका लागि र बझाङको क्षेत्र नम्बर १ (क) मा सुदूरपश्चिम प्रदेश सभा सदस्यका लागि उपनिर्वाचन हुँदैछ । इलाममा तत्कालीन एमालेका सांसद सुवास नेम्वाङको निधन भएकाले र बझाङमा तत्कालीन आन्तरिक मामिला तथा कानुन मन्त्री पृथ्वीबहादुर सिंहको निधन भएकाले उपनिर्वाचन हुन लागेको हो ।

कांग्रेसले इलाम क्षेत्र नम्बर २ का लागि भेषराज आचार्य, डम्बरबहादुर खड्का, केशव थापा, नगेन्द्र कुमार, रमेश लिङ्देन, चन्द्रमाया लिम्बु र शान्तिकला तामाङमध्ये एक जनालाई उम्मेदवार बनाउनेछ । 

बझाङमा अभिषेक सिंह, सत्यराज भण्डारी, विष्णु कुमार सिंह, जगतप्रसाद जोशी, नन्दकृष्ण जोशी, लोकेन्द्र बहादुर रोकाया, शान्तिकुमारी बोहरा, अर्जुन स्याडाँ, ध्रुवराज उपाध्याय र नारायण हमालमध्ये एक जना उम्मेदवार बन्नेछन् ।