शेखर उठेर हिँडेपछि बुधबारलाई सर्यो कांग्रेसको उम्मेदवार छान्ने बैठक

२० चैत, काठमाडौं । मंगलबार ढिलो गरी बुढानिलकण्ठमा बसेको नेपाली कांग्रेसको संसदीय बोर्ड र केन्द्रीय कार्यसम्पादन समितिका नेताहरूको बैठकले इलाम र बझाङमा हुने उपनिर्वाचनका लागि उम्मेदवार छान्न सकेन । सभापति शेरबहादुर देउवा र उपसभापति पूर्णबहादुर खड्का इलाममा डम्बर खड्काको पक्षमा अडिग रहे भने शेखर कोइराला यसको विपक्षमा । 

वैशाख १५ गते हुने तय भएको उपनिर्वाचनका लागि यही चैत २४ गते उमेदवारको मनोनयन पत्र दर्ता गरिँदै छ । जसका लागि उम्मेदवार छान्न भन्दै सभापति देउवाले आज बैठक बोलाएका थिए । उमेदवार चयनलाई लिएर पार्टीमा विवाद देखिएको छ । नेताहरू शेखर कोइराला, शशांक कोइराला सहितले देउवाले अडान नछाडेपछि बैठक वहिस्कार गरे । शेखर उठेपछि अरु पनि क्रमश बाहिरिए । 

बैठकमा सहभागी एक नेताका अनुसार पार्टी सभापति देउवा र उपसभापति खड्काले इलाम–२ मा डम्बर खड्कालाई उमेदवार बनाउने प्रस्ताव गरेका थिए । तर, अर्को पक्षले उनीहरूको प्रस्तावलाई अस्विकार गर्यो । नेताहरू शेखर कोइराला, महामन्त्री गगन थापा, सहमहामन्त्रीद्वय जीवन परियार र बद्री पाण्डे भेषराज आचार्यको पक्षमा उभिए । सहमति नभए पछि केहीबेर शेखरले देउवा र खड्कासँग कुरा गरेका थिए । नमिल्ने भएपछि उनी बाहिरिए । 

कोइरालाले देउवासँग भनेका थिए, ‘इलामको विषयमा सबैले भेषराजले जित्छ भन्दै छन् । तपाईं किन ढिपी गर्नुहुन्छ । भेषराजलाई टिकट नदिए हारिन्छ । अब जित हारको जिम्मा तपाईं नै लिनुस् । म जान्दिन ।’ मंगलबारको छलफलमा शशांक कोइरालाले पनि समर्थन जनाएका थिए । शेखर हिँडेपछि उनी पनि बाहिरिएका थिए ।

देउवाले भने निरन्तर खड्का गएको निर्वाचनमा ११४ मतले मात्र पराजित भएको तर्क गरेका थिए । ०७९ को निर्वाचनमा स्वर्गीय सुवास नेम्वाङ ३० हजार २० मत ल्याएर निर्वाचित भएका थिए । उनका प्रतिस्पर्धी खड्काले २९ हजार ९०६ मत ल्याएका थिए । सभापति देउवाले डम्बर मान्दैन, म कसरी मनाउने हो । भोलि इलाममा विवाद हुन्छ भनेका थिए । 

मंगलबार कुनै सहमति हुन नसकेपछि बुधबारका लागि बैठक बोलाइएको छ । बुधबार दिउँसो २ बजे संसदीय बोर्डको र अपरान्ह ४ बजे कार्यसम्पादन समितिको बैठक बोलाइएको छ ।