उम्मेदवार छान्न बुढानिलकण्ठमा कांग्रेस संसदीय बोर्डको बैठक, यसपछि कार्य सम्पादन बस्ने

२१ चैत, काठमाडौं । सभापति शेरबहादुर देउवाको निवास बुढानिलकण्ठमा नेपाली कांग्रेसको संसदीय बोर्डको बैठक सुरु भएको छ । संसदीय बोर्डबाट इलाम र बझाङमा हुने उपनिर्वाचनका उम्मेदवार टुंग्याएपछि केन्द्रीय कार्यसम्पादन समितिको बैठक बस्नेछ । कांग्रेस संसदीय बोर्डमा १३ जना पदाधिकारी छन् । हिजोको बैठकमा उम्मेदवारबारे सहमति नभएपछि आज पनि बैठक बोलाइएको हो । 
 
उपनिर्वाचनको उम्मेदवार टुंग्याउन सभापति देउवा तीन दिनदेखि नियमित छलफल गरिरहेका छन् । तर, देउवा र संस्थापन इतर समूहका नेता शेखर कोइरालाबीच सहमति हुन सकेको छैन । आगामी वैशाख १५ मा इलाम—२ र बझाङ प्रदेशसभा—१ को उपनिर्वाचन तोकिएको छ । 

इलाम— २ को टिकटका लागि जिल्ला सभापति डम्बर खड्का र महाधिवेशन प्रतिनिधि भेषराज आचार्यबीच मुख्य भिडन्त छ । सभापति देउवाले खड्काको नाम प्रस्ताव गरेका छन् भने विकल्पमा नेता शेखर कोइरालाले आचार्यको नाम अगाडि सारेका छन् । बझाङ प्रदेशसभा १ को उम्मेदवारमा पनि जगत जोशी र अभिषेक सिंहको हानथाप चलिरहेको छ । देउवाले सिंह र कोइरालाले जोशीको नाममा अडान लिइरहेका छन् ।