कांग्रेस सभापति देउवाले पेलेरै इलाममा खड्का र बझाङमा सिंहलाई बनाए उम्मेदवार

२२ चैत, काठमाडौं । नेपाली कांग्रेसले उपनिर्वाचनका लागि उम्मेदवारकाे टुंगो लगाएको छ । तीन दिनदेखि लगातार बसेको बैठकमा सभापति देउवाले आफ्नो अडान नछाडेपछि उनले भनेकै खड्का र जोशी उम्मेदवार बन्ने भएका छन् । आज बसेको बोर्ड बैठकले इलाम क्षेत्र नम्बर २ मा डम्बर खड्का र बझाङ १ (क) मा अभिषेक सिंहलाई उमेदवार बनाउने भन्दै कार्यसम्पादन समितिमा नाम सिफारिस गरेको छ । 

संसदीय बोर्डले दुई जनाको मात्र नाम कार्यसम्पादन समितिमा सिफारिस गरेपछि उनीहरु उम्मेदवार भएका छन् । खड्का पार्टी सभापति शेरबहादुर देउवानिकट मानिन्छन् । आगामी वैशाख १५ गते यी दुई क्षेत्रमा उपनिर्वाचन हुँदैछ । बैठकमा सहभागी एक पदाधिकारीका अनुसार बोर्डले खड्कालाई टिकट दिने निर्णय गर्दै कार्य सम्पादन समितिलाई सिफारिस गरेको छ । 

यसअघि इलाम–२ र बझाङ प्रदेशसभा–१ को उपनिर्वाचनका उम्मेदवार टुंग्याउन कांग्रेसमा चर्को रस्साकस्सी देखिएको थियो । इलाम– २ को टिकटका लागि जिल्ला सभापति डम्बर खड्का र महाधिवेशन प्रतिनिधि भेषराज आचार्यबीच मुख्य भिडन्त थियो । सभापति देउवाले खड्काको नाम प्रस्ताव गरेका थिए भने विकल्पमा नेता शेखर कोइरालाले आचार्यको नाम अगाडि सारेका थिए ।

यस्तै बझाङ प्रदेशसभा १ को उम्मेदवारमा पनि जगत जोशी र अभिषेक सिंहको हानथाप चलिरहेको थियो । देउवाले सिंह र कोइरालाले जोशीको नाममा अडान लिइरहेका थिए । देउवाको निवास बूढानीलकण्ठमा बुधबार बिहान उम्मेदवारका आकांक्षीसँग सामूहिक छलफल समेत गरेको थियो । त्यसपछि पनि देउवाले खड्कालाई नै यो पटक उम्मेदवार नबनाए अन्याय हुन्छ भनेर अडान लिएपछि बोर्ड बैठकले उनको नाम पठाएको हो ।