लुम्बिनी प्रदेशको मुख्यमन्त्री बन्न महरालाई २ मत पुगेन

२२ चैत, बुटवल । नेकपा माओवादीका संसदीय दलका नेता जोखबहादुर महरालाई लुम्बिनी प्रदेशको मुख्यमन्त्री बन्न सत्ता गठबन्धनसहित स्वतन्त्र सांसद जोड्दा पनि मत नपुग्ने भएको छ । लुम्बिनी प्रदेशमा चार दलबीच माओवादीको नेतृत्वमा सरकार गठन गर्ने सहमति भएपनि मत नपुग्ने देखिएको हो । 

सत्ता गठबन्धनका नेकपा एमाले, जनता समाजवादी पार्टी (जसपा), एकीकृत समाजवादी र एक स्वतन्त्र सांसदले मुख्यमन्त्रीमा माओवादी संसदीय दलका नेता जोखबहादुर महरालाई समर्थन गर्ने सहमति गरेका हुन् । सत्ता गठबन्धनका दलहरूले समर्थन गरे पनि मुख्यमन्त्री दाबीका लागि महरालाई बहुमत पुगेको छैन । 

८७ सदस्यीय प्रदेशसभामा बहुमतका लागि ४४ प्रदेश सांसदको समर्थन चाहिन्छ । सत्ता गठबन्धनसँग एमाले (२९), माओवादी (सभामुख बाहेक ८), जसपा (३), एकीकृत समाजवादी (१) र स्वतन्त्र सांसद खड्ग बस्नेत गर्दा ४२ मात्र हुन्छ । दुई मत पुग्दैन ।