सुनसरीमा हिंसात्मक झडप रोक्न सीडीओले थाले छलफल, कर्फ्यु जारी

२४ चैत, सुनसरी । तीन दिनदेखि जारी तनावबारे स्थानीय सबै पक्षसँग सुनसरीका सीडीओ जयनारायण आचार्यले छलफल  थालेका छन् । उनले शनिबार बिहान निषेधाज्ञा लगाइएका क्षेत्रको अवलोकन गरी सबै पक्षलाई छलफलका लागि बोलाएका हुन् । जिल्ला प्रशासन कार्यालय सुनसरीमा अहिले छलफल सुरु भएको छ ।  
 
सामान्य विवादको विषय दुई धार्मिक समूहबीच हिंसात्मक झडपमा उत्रिएपछि सदरमुकाम इनरुवासहित सुनसरीका ५ वटा पालिकामा शुक्रबारदेखि लगाइएको कर्फ्यु अहिले पनि जारी छ । मुस्लिम र हिन्दु समुदायबीच तनाव उत्पन्न भएपछि सुनसरी जिल्ला प्रशासन कार्यालयले इनरुवा नगरपालिका, हरिनगर गाउँपालिका, देवानगन्ज गाउँपालिका, भोक्राहा नरसिंह गाउँपालिका र कोसी गाउँपालिकामा अर्को सूचना नआएसम्मका लागि शुक्रबार साँझ ५ बजेदेखि कर्फ्यु आदेश जारी गरेको थियो ।  

दुई समुदाय बीचको विवाद समाधानका विषयमा आज सर्वदलीय/सर्वपक्षीय बैठक बसेको हो । बिहान साढे १० बजे जिल्ला प्रशासन कार्यालयमा सर्वदलीय सर्वपक्षीय बैठक राखेर विवाद समाधानका विषयमा छलफल गरिने प्रमुख जिल्ला अधिकारी आचार्यले बताए । केही दिनयता सुनसरीका सीमावर्ती क्षेत्रमा सामाजिक र धार्मिक सद्भाव खल्बल्याउने गरी दुई धार्मिक समुदायबीच झडप भइरहेका छन् । 

गत बिहीबार एक समूहले हिन्दु समुदायका युवालाई मरणासन्न हुने गरी कुटपिट गरेको थियो । त्यसपछि तनावले उग्ररुप लिँदा सम्भावित हिंसा रोक्न प्रशासनले कर्फ्यु लगाएको हो । स्थिति अझै सामान्य भइसकेको छैन ।