उपनिर्वाचनका लागि इलाममा शर्मा र बझाङमा साउद तोकिए संयोजक

२५ चैत, काठमाडौं । नेपाली कांग्रेसले वैशाख १५ मा हुने उपनिर्वाचनका लागि महामन्त्री विश्वप्रकाश शर्मा र नेता एनपी साउदलाई पार्टीका तर्फबाट संयोजक तोकेको छ । कांग्रेसले इलाम–२ र बझाङको प्रदेश सभा १ (क) को उपनिर्वाचनका लागि चुनाव परिचालन संयोजक तोकेको हो । 

इलाम–२ का लागि महामन्त्री शर्मा र बझाङ प्रदेश सभा १ (क) का लागि नेता एनपी साउद संयोजक तोकिएको कांग्रेसले जनाएको छ । कांग्रेसले इलाम–२ मा डम्बर खड्का र बझाङ प्रदेशसभा १ (क) मा अभिषेक सिंहलाई उम्मेदवार बनाएको छ । नेपाली कांग्रेस इलामका सभापति खड्का गत निर्वाचनमा नेकपा एमालेका नेता सुवास नेम्वाङसँग ११४ मतले पराजित भएका थिए । 
 
सिंह सडक दुर्घटनामा मृत्यु भएका सुदूरपश्चिमका पूर्वमन्त्री पृथ्वीबहादुर सिंहका छोरा हुन् । इलाम–२ र बझाङको चुनावी प्रचार अभियानलाई प्रभावकारी बनाउने गरी कार्यक्रमहरू तय गर्ने जिम्मा उनीहरुलाई दिइएको छ । केन्द्रीय नेता देखि स्थानीय नेता तथा कार्यकर्ता परिचालन गर्न उनीहरुले भूमिका निभाउनेछन् ।