मुख्यमन्त्रीको सिफारिसलाई लत्याउँदै कोशीका प्रदेश प्रमुख खापुङले वैशाख ६ मा बोलाए विशेष अधिवेशन

२८ चैत, विराटनगर । कोशी प्रदेशका प्रदेश प्रमुख पर्शुराम खापुङले वैशाख ६ गतेका लागि प्रदेशको अधिवेशन आह्वान गरेका छन् । उनले कोशी प्रदेश सरकारको सिफारिसलाई चुनौती दिएर वैशाख ६ गते अधिवेशन बोलाएका हुन् । विशेष अधिवेशनका लागि एक चौथाइभन्दा बढी प्रदेश सदस्यको माग हुनु पर्दछ । प्रदेश प्रमुख खापुङले एमाले र माओवादीको मागलाई ध्यान दिएर अधिवेशन बोलाएका हुन् । 

कोशीका मुख्यमन्त्री केदार कार्कीले मन्त्रिपरिषद्को निर्णय अनुसार ११ जेठ २०८१ मा संसदको नियमित अधिवेशन आव्हानका लागि निवेदन दिएका थिए । तर, प्रदेश प्रमुख खापुङले ६ वैशाख २०८१ दिउँसो १ बजे प्रदेशसभाको अधिवेशन आह्वान गरेका छन् । सरकार गठनकै विषयमा संवैधानिक जटिलता देखिरहेका बेला प्रदेश प्रमुखको यो कदमले थप विवाद निम्त्याउने देखिएको छ । 

२६ चैतमा केदार कार्की नेतृत्वको सरकारलाई दिएको समर्थन फिर्ता लिएको नेकपा एमाले र माओवादी केन्द्रका ५२ सांसदले मुख्यमन्त्री र सरकारलाई निर्देशन दिनुपर्ने भएकाले अधिवेशन मागसहित निवेदन दिएका थिए ।  सोही आधारमा उनले विशेष अधिवेशन बोलाएका हुन् ।