इन्डिगो एयरलाइन्सको सीटमा १ केजी सुन भेटियो, ल्याउने मान्छे भेटिएन

६ वैशाख, काठमाडौं । त्रिभुवन अन्तर्राष्ट्रिय विमानस्थलमा जहाजको सीटमा भेटिएको एक किलो सुन बरामद भएपनि यो कसले ल्याएको हो भन्ने खुलेको छैन् । दिल्लीबाट बुधबार आएको इन्डिगो एयरलाइन्सको सिटमा १ किलो ७० ग्राम सुन बरामद भएको विमानस्थलका एसएसपी कृष्णहरि शर्मा पोखरेलले बताए । तर, यो ल्याउने व्यक्ति को थियो भन्ने खुलेको छैन् । 

विमान अवतरण हुने बित्तिकै प्रहरीले नियमित जाँच गर्ने क्रममा उक्त परिमाणको सुन भेटिएको हो । प्रहरीले खोजतलास गरेपछि सुन लिएर आएका व्यक्ति डराएर छाडेर भागेको हुनसक्ने आशंका गरिएको छ । फ्लाइट नम्बर ६ ई ११५१ नम्बरको इन्डिगो एयरलाइन्सको सिट नम्बर २७ चार्लीको पछाडि र २८ चार्लीको अगाडिको सिट पाकेटको तल बेवारिसे अवस्थामा रहेका झोलाबाट उक्त सुन बरामद भएको हो ।

कालो र सेतो रङको टेपले बेरिएको अवस्थामा सुन बरामद भएको एसएसपी पोखरेलले बताए । जसमा ३ थान सिक्री, ६ थान बिस्कुट, त्रिभूज आकारको सुनको टुक्रा २ थान र सिक्री जोड्ने साना रिङ गरी १ किलो ७० ग्राम बराबरको सुन बरामद भएको हो । 
 
विमानस्थल हुँदै पटक पटक सुन तस्करी हुँदै आएको छ । अरु समयमा प्रहरीले व्यक्तिसहित सुन बरामद गर्दै आएको थियो भने यो सुन वेवारिसे अवस्थामा भेटिएको हो ।