रौनियारसहित २९ ठेकेदारका निमार्ण कम्पनी कालोसूचीमा

११ बैशाख, काठमाडौं । समयमै काम सम्पन्न नगरेको अभियोगमा पटक पटक कारवाहीमा पर्दै आएका पप्पुसहित २९ जना ठेगेदारका निमार्ण कम्पनी कालोसूचीमा परेका छन् । देशमा धेरै ठाँउमा काम लिएर अलपत्र पार्ने पप्पु कन्स्ट्रक्सनका मालिक हरिनारायण प्रसाद रौनियार यसअघि संघीय समाजवादी फोरमका सांसदसमेत थिए ।   
 
सार्वजनिक खरिद अनुगमन कार्यालयले पूर्वाधार निर्माणका काम र खरिद प्रक्रिया अलपत्र पार्ने कम्पनीलाई कालोसूचीमा राखेको हो । विभिन्न सार्वजनिक निकायबाट कालोसूचीमा राख्नका लागि सिफारिस भएपछि कार्यालयले ति कम्पनीलाई कालोसूचीमा राखेको हो ।

कार्यालयका अनुसार ऊर्जा, जलस्रोत तथा सिँचाइ मन्त्रालय, जलस्रोत तथा सिंचाइ विभाग, सिक्टा सिांचय आयोजना, नेपालगञ्ज, बाँकेको सिफारिसमा पप्पु कन्स्ट्रक्सनलाई २ वर्ष ६ महिनाको लागि कालोसूचीमा राखिएको छ । यो कम्पनी यस अघि पनि कारवाहीमा पर्दै आएको कम्पनी हो । 

सामाजिक विकास मन्त्रालय, सार्वजनिक निर्माण कार्यान्वयन इकाइ, गजुरी, धादिङको सिफारिसमा सप्तकोषी जलाधार ÷ ओम साइ एण्ड कम्पनी जे.भीलाई २ वर्षसम्मको लागि कालोसूचीमा राखिएको छ । कालोसूचीमा परेको अवधिभर यी कम्पनीहरुले अरु कुनै पनि सरकारी निकायको पूर्वाधार निर्माणका काम तथा खरिद प्रणालीमा संलग्न हुन पाउने छैनन् । 

कोशी एण्ड न्यौपाने ओम साई कन्स्ट्रक्सन जे.भीलाई २ वर्ष, ए वान खप्तड कन्स्ट्रक्सन एण्ड अर्डर सप्लायर्सलाई २ वर्ष, चण्डी सिद्धिबाबा जे.भीलाई २ वर्ष, नमुना कन्स्ट्रक्सन खिम्ती प्रा. लिलाई २ वर्ष, नवीन कन्स्ट्रक्सनलाई १ वर्ष ६ महिनाको लागि कालो सूचीमा राखिएको छ ।

यस्तै कार्यालयले २९ मध्ये १ कम्पनीलाई २ वर्ष ६ महिना कालोसूचीमा राखिएको छ भने ८ कम्पनीलाई २ वर्षको लागि कालोसूचीमा राखिएको छ । यस्तै कार्यालयले ७ कम्पनीलाई १ वर्ष ६ महिना, १ कम्पनीलाई १ वर्ष ३ महिनाको लागि कालोसूचीमा परेका छन् भने अन्य कम्पनीलाई १ वर्षको लागि कालोसूचीमा परेका छन् ।