राष्ट्रपतिलाई नेपालका लागि चीनका राजदूत हौ यान्छीद्धारा स्वागत

एजेन्सी । राष्ट्रपति विद्यादेवी भण्डारी बुधबार सान्सी प्रान्तको राजधानी सियान पुगेकी छन् । आफ्ना चिनियाँ समकक्षी सी चिनफिङको निमन्त्रणामा चीनको राजकीय भ्रमणका क्रममा नेपाल वायुसेवा निगमको विमानबाट बुधबार राष्ट्रपति भण्डारी सियान पुगेकी हुन् । उनि वैशाख ११ देखि १९ गतेसम्म भ्रमणमा रहनेछिन् ।

राष्ट्रपति भण्डारीलाई आजै सान्सी प्रान्तको राजधानी सियानस्थित अन्तर्राष्ट्रिय विमानस्थलमा नेपालका लागि चीनका राजदूत हौ यान्छीले स्वागत गरेकी हुन् । भ्रमणका क्रममा राष्ट्रपति बेइजिङमा आयोजना हुने दोस्रो बेल्ट एण्ड रोड फोरम फर इन्टरनेशनल कोअपरेसनमा सहभागी हुनेछिन‍ । साथै राष्ट्रपति भण्डारीले उक्त फोरमलाई सम्बोधन गर्ने कार्यक्रम रहेको परराष्ट्र मन्त्रालयले जनाएको छ ।

भ्रमणका अवसरमा नेपाल र चीनका राष्ट्रपतिबीच प्रतिनिधिमण्डलस्तरीय द्विपक्षीय वार्ता हुनेछ । वार्तापछि पारस्परिक सहयोगसम्बन्धी समझदारीपत्रमा हस्ताक्षर हुनेछ । राष्ट्रपति भण्डारीले वरिष्ठ चिनियाँ अधिकारीसँग बेग्लाबेग्लै भेटवार्ता गर्ने कार्यक्रम रहेको परराष्ट्र मन्त्रालयले जनाएको छ ।

राष्ट्रपति भण्डारीका साथ परराष्ट्रमन्त्री प्रदीपकुमार ज्ञवाली, प्रदेश नं ३ का मुख्यमन्त्री डोरमणि पौडेल, सङ्घीय संसद्का सदस्य, नेपाल सरकारका उच्च अधिकारी, चीनका लागि नेपाली राजदूत, निजी क्षेत्रका प्रतिनिधि र सञ्चारकर्मी छन् । राष्ट्रपति भण्डारी यही वैशाख १९ गते स्वदेश फर्कने कार्यक्रम छ ।