इलाममा १३ जना उम्मेदवार मत १०० कटेन, बझाङमा ६ दलकोे मत ५० मुनि

१७ वैशाख, काठमाडौं । इलाम क्षेत्र नम्बर–२ मा मतगणना जारी छ । हालसम्म २७ हजार ८७५ मतगणना गरिएको छ । त्यसमध्ये २७ हजार ६१४ मत सदर भएको मुख्य निर्वाचन अधिकृतको कार्यालयले जानकारी गराएको छ ।

२७ हजार ८७५ मतगणना गर्दा स्वतन्त्र उम्मेदवार डाकप्रसाद गौतमले एक मत पाएका छन् । इलाम–२ मा १९ उम्मेदवारमध्ये उनी सबैभन्दा पुछारमा छन् । स्वतन्त्र उमेदवार धनराज रानामगरले दुई मत पाएका छन् । अरू स्वतन्त्र उमेदवारहरू योगेन्द्र गुरुङ र मनोज निरौलाले समान तीन÷तीन मत पाएका छन् ।
 
नेपाल मजदुर किसान पार्टीका उम्मेदवार श्यामबहादुर दर्जीले १३, राप्रपा नेपालका गणेशबहादुर चौहानले १५ मत पाएका छन् । राष्ट्रिय मुक्ति आन्दोलन नेपालका जयवन्त विक्रम शाहले १८, स्वतन्त्र उम्मेदवार दिपेश बोहोराले १८ मत पाएका छन् ।

स्वतन्त्र उम्मेदवार राज वश्यालले २२, अर्का स्वतन्त्र उम्मेदवार अर्जुनबहादुर शाहीले २८ मत पाएका छन् । राप्रपाका तर्फबाट उम्मेदवारले ५५, जनमत पार्टीका प्रेमकुमार थाम्सुहाङले ६६, नेपाली जनता दलका रेशमबहादुर सुनारले ६६ मत प्राप्त गरेका छन् ।

यस्तै बझाङमा जसपासहित ६ दलले ५० मत ल्याउन सकेका छैनन् । बझाङ १ ‘क’ मा चुनाव लडेका ११ मध्ये ६ वटा दलले ५० मत पनि ल्याउन सकेका छैनन् । मुख्य निर्वाचन अधिकृतको कार्यालयका अनुसार २६ हजार ७८५ सदर मत गणना भइसकेको छ । जसमा नेकपा एमालेका दमनबहादुर भण्डारीको अग्रता कायमै छ । उनलाई नेपाली कांग्रेसका अभिषेक सिंहले पछ्याइरहेका छन् । 
 
५० मत नल्याउनेमा जसपासहितका दल रहेका छन् । जसपाका उम्मेदवार रामबहादुर जाग्रीले ४१ मत प्राप्त गरेका छन् । नेपाल मजदुर किसान पार्टीका खगेन्द्रबहादुर शाहीले २४, जनमतका शुसिलादेवि विष्टले २५ मत पाएका छन् । 

संघीय लोकतान्त्रिक राष्ट्रियमञ्चका दीपबहादुर खड्काले २७ मत प्राप्त गरेका छन् । नेशनल रिपब्लिक नेपालका कमल घर्तीमगरले २ मत ल्याउँदा राष्ट्रिय मातृभूमि पार्टीका गजेन्द्रबहादुर थापाले ३५ मत प्राप्त गरेका छन् ।