नेकपा एसको बझाङमा जमानत जफत, इलाममा उही हाल

१७ वैशाख, काठमाडौं । बझाङमा नेकपा एकीकृत समाजवादीका दिलबहादुर सिंहसहित ८ उमेदवारको जमानत जफत भएको छ । निर्वाचन आयोगका अनुसार तीन दलबाहेक अरु दलले कूल सदर मतको १० प्रतिशत मत ल्याउन सकेका छैनन् । शनिबार भएको मतगणनाको परिणाम सोमबार दिउँसो घोषणा गरिएको छ । 

जसमा कूल सदर मतको १० प्रतिशतभन्दा कम मत ल्याउने उम्मेदवारको धरौटी जफत हुने व्यवस्था गरिएको छ । बझाङ १ को कूल सदर मत अनुसार धरौटी जोगाउनका लागि उमेदवारले कूल २ हजार ९ सय बढी मत ल्याउनुपर्ने हुन्छ । 

मत परिणामको अन्तिम विवरण अनुसार एकीकृत समाजवादीका दिलबहादुर सिंहले २ हजार ५१४ मत प्राप्त गरेका छन् ।   एकीकृत समाजवादीले २५ सय मत कटाए पनि जमानत जोगाउन सकेन । राष्ट्रिय प्रजातन्त्र पार्टी (राप्रापा) का किशोर कुमार खड्काले २४२ मत पाएका छन् ।  जनता समाजवादी पार्टी (जसपा) का उमेदवार रामबहादुर जाग्रीले ४४ मत प्राप्त गरेका छन् ।  राष्ट्रिय मातृभूमि पार्टीका गजेन्द्र बहादुर थापाले ३५ मत ल्याएका छन् । 

संघीय लोकतान्त्रिक राष्ट्रियमञ्च दीपबहादुर खड्काले २८, जनमतका सुशीलादेवी विष्टले २६ मत ल्याएका छन् । नेपाल मजदुर किसान पार्टी (नेमकिपा) का खगेन्द्रबहादुर शाहीले २४ मत पाउँदा नेशनल रिपब्लिक नेपालका कमल घर्तीमगरले २ मत ल्याए । प्रदेशसभा निर्वाचनका लागि उमेदवारले पाँचहजार रुपैयाँ निर्वाचन अधिकृतको कार्यालयमा धरौटी राख्नुपर्ने व्यवस्था ऐनमा रहेको छ । कूल सदर मतको १० प्रतिशत कटाउन नसक्ने उमेदवारको उक्त जमानत जफत हुनेछ ।

यस्तै इलाममा पनि नेकपा एसले जमानत जोगाउन देखिएको छैन । सम्मानीत नेता झलनाथ खनाललाई चुनावी कमाण्डर बनाए पनि उनको खासै प्रभाव देखिएन । नेकपा एसले ३४ हजार मत गणना हुँदा तीन सय मत पनि कटाउन सकेको छैन । खनालको जोडबलमा पार्टीले उमेदवारी दिएको हो । उमेदवार आफै स्वयम् यहाँका मतदाता पनि होइनन् । 

११०१२ मत गणना हुँदा चुलाचुली गाउँपालिकामा नेकपा एसले २२३ मत पायो । वडा नम्बर १ मा ६७, वडा नम्बर २ मा ५६, वडा नम्बर ३ मा ९४ मत प्राप्त गरेको थियो । यस्तै वडा नम्बर ४ मा ४ तथा वडा नम्बर ५ र ६ मा समान एक–एक प्राप्त गरेको थियो ।
 
९५२४ मत गणना भएको फाकफोकथुम गाउँपालिकामा जम्मा १७ मत पाएको छ । वडा नम्बर २ बाट ६, वडा नम्बर ४ बाट ६ र वडा नम्बर ६ बाट ५ मत पाए । वडा नम्बर १,३,५,७ मा शुन्य मत एसले पाएको छ । ७०७८ मत गणना भएको माङ्सेवुङबाट उमेदवार राईलाई २० मत आएको छ । यहाँ वडा नम्बर ३ मा १५, वडा नम्बर ३ मा ३, वडा नम्बर ५ बाट १ र वडा नम्बर १ मत पाएका छन् । माइ नगरपालिकाको ६ वडाबाट १, वडा नम्बर ७ वाट २५ तथा वडा नम्बर ८ बाट १ मत पाउँदा कुल मत २७ मत आएको छ । देउमाइ नगरपालिकाबाट उनलाई १ मत मात्र आएको छ ।