पालैपालो प्रधानमन्त्री बन्ने कुरा भएकै थिएन, प्रायोजित हौवा फिजाइयोः यादव

२६ वैशाख, काठमाडौं । जनता समाजवादी पार्टी नेपालका अध्यक्ष उपेन्द्र यादवले अहिलेको सत्ता समीकरण भत्काएर शेरबहादुर देउवा, माधव नेपाल र म पालैपालो प्रधानमन्त्री बन्ने भन्ने कुरा प्रायोजित भएको बताएका छन् । उनले प्रायोजित हौवा फैलाएर समीकरणका नाममा आफ्नो पार्टी बिभाजन गराउने काम भएको उनले बताएका छन् । 

बुधबार आयोजित पत्रकार सम्मेलनमा अध्यक्ष यादवले नयाँ दल दर्ता असंवैधानिक भएको बताए । प्रचण्ड नेतृत्वको सरकार ढालेर प्रधानमन्त्री बन्ने भन्ने निधार हल्ला चलाइएको र यसको वास्तविकता कुनै दिन खुल्ने बताए । यादवले प्रधानमन्त्रीलाई समेत भ्रममा पारेर आफ्नो दल फुटाइएको दाबी गरे । आफ्नो दलबाट फुटेर अशोक राईको नेतृत्वमा गठन भएको नयाँ दल जनता समाजवादी पार्टी अवैधानिक भएको उनले दाबी छ । 

उपप्रधान तथा स्वास्थ्यमन्त्री समेत रहेका यादव अमेरिका भ्रमणमा रहेका बेला जसपा फुटेको थियो । अशोक राईको नेतृत्वमा नयाँ दल निर्वाचन आयोगमा दर्ता भएको छ । कांग्रेस र एकीकृत समाजवादीसँग मिलेर नयाँ सरकार बनाउन खोजेको हल्ला गलत भएको उनले दाबी गरे । यो सरकार बनेदेखि कांग्रेसका कसैसँग भेट समेत नभएको भन्दै यादवले भने, ‘यो सरकार ढालेर अर्को सरकार बनाउँदैछ भन्ने अत्यन्त कपोल्कल्पित हल्ला थियो । त्यस किसिमको कुनै आवश्यकता पनि थिएन, प्रयास पनि थिएन ।’

आफू देश बाहिर रहेको बेला दल फुटाउन प्रधानमन्त्रीलाई भ्रममा परेको महसुस भएको उनले बताए । अमेरिकाबाट फर्किएलगत्तै प्रधानमन्त्रीलाई भेटेका यादवले भने, ‘जुन हौवा फिजाइयो, उहाँ पनि त्यो भ्रममा पारेको भन्ने बुझियो ।’ उनले सरकारलाई दिएको समर्थन कायमै राख्ने बताए । ‘सरकारप्रति निरन्तर समर्थन छ, यो रहन्छ,’ उनले भने, ‘बाँकी कसरी परिस्थिति विकास हुन्छ भन्नेमा निर्भर हुन्छ ।’

उनले सरकारबाहिर गएपछि कांग्रेससँग भेटघाट नै नभएको दाबी गरे । यादवले आफूहरूका कारण राजनीतिक स्थिरता नआउने दाबी समेत गरे । हाम्रै कारणले राजनीतिक अस्थिरता आउँदैन, यादवले भने, पार्टीमा दुईतिहाइ बढी बहुमत हाम्रै छ । संसदीय दलमा बहुमत हाम्रै छ । उनले सरकारलाई समर्थन कायम रहेको बताउँदै बाँकी कोर्ष कसरी जान्छ भन्ने आफ्नो हातमा नरहेको बताए ।