भोलिबाट सुरु हुने संसद अधिवेशनमा कसरी प्रस्तुत हुने भन्ने रणनीति बनाउँदै कांग्रेस

२७ वैशाख, काठमाडौं । नेपाली कांग्रेस संसदीय दलको बैठक आज बस्दैछ । बैठक दिउँसो २ बजे संसद भवन नयाँबानेश्वरको ल्होत्से हलमा बस्ने छ । बैठकमा शुक्रबारदेखि सुरु हुने संसदको बर्खे अधिवेशनमा कसरी प्रस्तुत हुने भन्ने रणनीति बनाइने बताइएको छ ।  

शुक्रबारदेखि सुरु हुने बजेट अधिवेशन सुरु हुँदैछ । सहकारी ठगीको विषयमा संसदीय छानविन समिति गठन गर्नुपर्ने माग कांग्रेसले उठाउँदै आएको छ । यसमा पार्टीले खेल्ने भूमिकाका विषयमा आज छलफल हुनेछ । समिति नबनेसम्म अधिवेशनको पहिलो बैठक बाट अवरोध गर्ने रणनीतिमा कांग्रेस छ । २८ गते दिउँसो २ बजे संघीय संसद भवन नयाँ बानेश्वरमा बस्ने बैठक अवरुद्ध गर्ने तयारी स्वरूप आज छलफल हुन लागेको हो । 

हिउँदे अधिवेशनमा कांग्रेसले सहकारीको रकम अपचलनमा मुछिएका उपप्रधानमन्त्री तथा गृहमन्त्री रवि लामिछाने उपर छानबिन गर्न संसदीय समिति गठनको माग उठाउँदै आएको थियो । कांग्रेसले संसदीय समिति माग गरिरहँदा ३ वैशाखमा सरकारले हिउँदे अधिवेशन नै अन्त्य गरेको थियो ।

अब शुक्रबारदेखि सुरु हुने बजेट अधिवेशनमा पनि कांग्रेसले आफ्ना माग उठाउने जनाएको छ । बिहीवार बसेको कांग्रेस पदाधिकारी र पूर्वपदाधिकारीहरुको बैठकले सहकारीको रकम अपचलनका विषयमा उपप्रधानमन्त्री तथा गृहमन्त्री रवि लामिछानेमाथि संसदीय छानबिन हुनुपर्ने मागबाट पछि नहट्ने निर्णय गरेको थियो ।