कोशी प्रदेश: एउटा कार्की मुख्यमन्त्रीको तयारीमा, अर्का कार्की पुगे सर्वोच्च

२७ वैशाख, विराटनगर । प्रदेश प्रमुखले संविधानको धारा १६८ को उपधारा ५ बमोजिम नयाँ सरकार गठन गर्न आह्वान गरेपछि कोशी प्रदेशमा फेरी राजनीतिक हानथाप सुरु भएको छ । नेकपा एमाले संसदीय दलका नेता हिक्मत कार्कीले मुख्यमन्त्रीमा दाबी पेस गर्ने तयारीमा जुटिरहेका बेला सरकारका मुख्यमन्त्री केदार कार्की मुद्दा हाल्न सर्वोच्चतिर लागेका छन् । 

प्रदेश प्रमुखको कदम संविधान विपरीत भएको दाबीसहित कार्की बदर गराउन माग गर्दै बिहीबार सर्वोच्च अदालतमा रिट दायर गर्न काठमाडौं पुगेका छन् । आज उनले रिट दायर गरेपछि भोलि शुक्रबार पेशी तोकिने सम्भावना छ । यसैले हिक्मत कार्की आज मुख्यमन्त्रीमा नियुक्त भएपनि भोलि सर्वोच्चले के फैसला दिन्छ टुंगो छैन ।   

मुख्यमन्त्री कार्कीले उपधारा ५ बमोजिमको सरकारले विश्वासको मत प्राप्त गरेको दुई वर्षसम्म अविश्वास प्रस्ताव ल्याउन नसक्ने प्रावधानलाई मिचेर आह्वान भएको दावी गरेका छन् । प्रदेश प्रमुखले गरेको संवैधानिक गल्ती सच्याएर न्यायिक निरुपणको लागि भन्दै उनी सर्वोच्च गएका हुन् । 

बिहीबार नै माओवादीसहितका ५२ जना प्रदेशसभा सदस्यको समर्थनमा प्रदेश प्रमुख कार्यालयमा सशरीर उपस्थित भई सनाखत गराए एमालेका कार्कीले नियुक्ति लिने तयारी गरेका छन् । बुधबार राति प्रदेश प्रमुख पर्शुराम खापुङले एमाले र माओवादी केन्द्रको दाबीअनुसार केदार कार्की नेतृत्वको सरकार अल्पमतमा परेको निष्कर्षसहित खापुङले सरकार गठनका लागि आह्वान गरेका थिए । 

वैशाख ७ गते एमाले र माओवादीले संकल्प प्रस्ताव पारित गराई सरकारलाई दिएको समर्थन नरहेको र विश्वासको मत लिनुपर्ने जिकिर गरेका थिए । बहुमतको अभिलेखिकरण गराइ त्यसको जानकारी प्रदेश प्रमुख कार्यालयलाई समेत गराइएको थियो । प्रदेश प्रमुख खापुङले मुख्य न्यायाधिवक्तासँग परामर्श गरी बुधबार राति उपधारा ५ बमोजिम नै सरकार गठनका लागि आह्वान गरेका हुन ।