सिके राउतको पोस्टर जताततै, महानगरले गर्ला त कारबाही ?

मनिष अर्याल / नेपाल फोटो लाइब्रेरी 

२८ वैशाख, काठमाडाैं । 'नौलो गणतन्त्र सामाजिक लोकतन्त्र २०८१ जेठ १५ गते काठमाडौको भृकुटीमण्डप जाऔ नौलो गणतन्त्रको आन्दोलनमा सहभागी होऔ' लेखिएको गुलाबी रङ्गको सिके राउतको फोटो भएको पोस्टर अहिले काठमाडाैं महानगर भित्रको पोल भित्ताहरुमा जताततै देख्न सकिन्छ ।

कोरिडोर होस या भद्रकालीको मुख्य सडक जताततै पोलहरुमा गुलाबि रङ्गको पर्चा देख्न सकिन्छ । नँया तथा वैकल्पिक भनिएको सिके राउतको पार्टीले काठमाडाैं महानगरको फोहोरमैला तथा वातावरण ऐन विपरीत जथाभावी पोस्टर टाँसिरहेको छ ।

काठमाडाैं महानगरले सार्वजनिक स्थान, भित्ता, विद्युत, टेलिफोनका पोलमा प्रचार प्रसार गर्ने उद्देश्यले टास्नेलाई फोहरमैला व्यवस्थापन ऐन २०६८ तथा नियमावली २०७० बमोजिम एक लाख रुपैया सम्म जरिवाना लिने गर्छ । 

केहि समय अगाडि काठमाडौं महानगरपालिकाले जथाभावी फिल्मको पोस्टर पोलमा टाँसेर वातावरण प्रदूषित गरेको भन्दै चलचित्र बगानको निर्मातालाई जरिवाना तिराएको थियो । चलचित्र बगानका निर्माता सुरेश वाग्लेले ५० हजार जरिवाना तिरेका थिए ।