गाजामा युद्ध रोक्न बाध्य पारिए इजराइल एक्लै भए पनि लड्छ : प्रधानमन्त्री नेतान्याहु

२८ वैशाख, काठमाडौं । गाजामा युद्ध रोक्ने अन्तर्राष्ट्रिय दबावलाई अस्वीकार गर्दै प्रधानमन्त्री बेन्यामिन नेतान्याहूले ‘बाध्य’ पारिए इजरायल हमास विरुद्धको युद्धमा ‘एक्लै खडा’ हुने घोषणा गरेका छन् । 

अमेरिकी राष्ट्रपति जो बाइडेनले दक्षिणी गाजा सहर रफाहमा इजरायलले लामो समयदेखि गरेको आक्रमणका लागि अमेरिकाले आक्रामक हतियार उपलब्ध नगर्ने बताएपछि नेतान्याहुले यस्तो टिप्पणी गरेका हुन् ।  
“एक मात्र यहुदी राज्य इजरायलको प्रधानमन्त्रीका रूपमा म आज यहाँ जेरुसेलमबाट यहुदी नरसंहार स्मरण दिवसमा प्रतिज्ञा गर्दछु, यदि इजरायल एक्लै खडा हुन बाध्य भयो भने इजरायल एक्लै खडा हुनेछ”, नेतान्याहूले भने, “तर हामीलाई थाहा छ कि हामी एक्लो छैनौँ,  संसार भरका सभ्य मानिसहरूले न्यायपूर्ण उद्देश्यलाई समर्थन गर्छन्, हामी हाम्रा नरसंहारका दुस्मनहरूलाई हराउने छौँ ।”

उनले ८० वर्षअघि यहुदीहरू रक्षा विहीन हुँदा कुनै पनि राष्ट्र उनीहरूको सहायताका लागि नआएको बताए। “आजभन्दा ८० वर्षअघि यहुदी नरसंहारमा हाम्रो विनाश खोज्नेहरू विरुद्ध यहुदी जनता पूर्णरूपमा रक्षा विहीन हुँदा कुनै पनि राष्ट्र हाम्रो सहयोगमा आएनन्”, मुलुकको वार्षिक यहुदी नरसंहार स्मृति दिवसलाई  सम्बोधन गर्दै उनले भने, “आज हामी पुनः हाम्रो विनाशमा आएका दुश्मनहरूको सामना गरिरहेका छौँ, म विश्वका नेतालाई भन्छु कुनै पनि दबाब र कुनै पनि अन्तर्राष्ट्रिय मञ्चको कुनै पनि निर्णयले इजरायललाई आफ्नो रक्षा गर्न रोक्न सक्दैन ।”
 
नेतान्याहुले एक्लै खडा हुनुपरे एक्लै खडा हुने प्रतिबद्धता व्यक्त गर्दै आवश्यक भएमा आफ्नै बलबुताले लड्ने बताए ।