प्रचण्ड सरकारले प्रेसमाथि धावा बोलेपछि अमेरिकी राजदूतावासले भन्योः सुशासन, प्रेस स्वतन्त्रता र जनताका मौलिक अधिकारहरू सुनिश्चित हुनुपर्छ

९ जेठ, काठमाडौं । नेपालको बामपन्थी सरकार प्रेस तथा अभिव्यक्ति स्वतन्त्रता हननतर्फ अग्रसर भइरहेका बेला नेपालस्थित अमेरिकी राजदूतावासले गम्भीर चासो र चिन्ता व्यक्त गरेको छ ।

आफ्नो अफिसियल फेसबुक पेजमा अमेरिकी सरकारको धारण राख्दै दूतावासले  सुशासन, प्रेस स्वतन्त्रता र जनताका मौलिक अधिकारहरू सुनिश्चित गर्नेबारे पनि नेपाल सरकार र नेपाली जनताले सार्थक संवाद गर्नेछन् भन्ने आशा राखेको जनाएको छ । 

कठिन संघर्षपश्चात् प्राप्त लोकतन्त्रलाई आकार दिने कार्यलाई नेपालले जारी राख्दै गर्दा प्रेस स्वतन्त्रता, जवाफदेही र पारदर्शिता जस्ता मार्गदर्शक सिद्धान्तहरू सरकारले भुल्न नहुने बताएको छ ।  

हिजो मंगलबार कान्तिपुर मिडिया ग्रुपका अध्यक्ष कैलाश सिरोहियालाई नागरिकता प्रकरणमा प्रहरीले प्रतिशोधपूर्ण तरिकाले कान्तिपुर कार्यालयबाटै पक्राउ गरेपछि दूतावासको यस्तो प्रतिक्रिया आएको हो । प्रचण्ड सरकार सञ्चारमाध्यम र पत्रकारहरूप्रति असहिष्णु बन्दै दमनतर्फ अग्रसर भएपछि अमेरिकी राजदूतावासले गम्भीरतापूर्वक घटनाक्रमहरू हेरिरहेको हो । 

अमेरिकी राजदूतावासले भनेको छ, “अझ परिपूर्ण मुलुक” बन्ने दिशामा आफ्नो प्रयास जारी राख्दै गर्दा अमेरिकाका निम्ति प्रेस स्वतन्त्रता, जवाफदेही र पारदर्शिता मार्गदर्शक सिद्धान्तहरू हुन् । कठिन संघर्षपश्चात् प्राप्त लोकतन्त्रलाई आकार दिने कार्यलाई नेपालले जारी राख्दै गर्दा सुशासन, प्रेस स्वतन्त्रता र जनताका मौलिक अधिकारहरू सुनिश्चित गर्नेबारे नेपाल सरकार र नेपाली जनताले पनि सार्थक संवाद गर्नेछन् भन्ने आशा हामीले राखेका छौँ ।